“Уйда ёлғиз 2” фильми юлдузи вафот этди

Бугун, 17 июль куни Ирландиялик актриса Бренда Фрикер 81 ёшида вафот этди. У томошабинларга “Уйда ёлғиз 2: Нью-Йоркда йўқолиш” комедиясидаги каптар боқувчи аёл роли орқали яхши таниш эди. Бу ҳақда унинг кўп йиллик агенти Фил Белфилд маълум қилди.

“Бугун эрталаб, 2026 йил 17 июль куни Бренди қисқа муддатли хасталикдан сўнг сокингина оламдан ўтганини чуқур қайғу билан маълум қиламиз. У яқинлари даврасида бу дунёни тарк этди”, дейилади унинг оиласи ва дўстлари номидан берилган расмий баёнотда.

Фрикер 1990 йилда Жим Шериданнинг “Менинг чап оёғим” драмасида фалаж бўлиб қолган рассом ва ёзувчи Кристи Брауннинг фидокор онаси – миссис Браун ролини юксак маҳорат билан ижро этиб, “Оскар” мукофотини қўлга киритган ва жаҳон кинематографияси тарихига кирган эди. У Америка киноакадемиясининг олтин статуэткасини қўлга киритган тарихдаги илк ирландиялик аёлга айланган.

Шунингдек, Бренда Фрикер ўзининг олтмиш йиллик фаолияти давомида Ирландия, Буюк Британия ва Голливудда театр, кино ва телевидение соҳаларида меҳнат қилиб, ўз авлодининг энг ҳурматли ва рамзий актрисаларидан бири деган номга сазовор бўлган. 

Эслатиб ўтамиз, аввалроқ Янги Зеландиялик актёр Сэм Нилл, асосан “Юра даврига саёҳат” фильмидаги палеонтолог доктор Алан Грант роли билан танилган ва 50 дан ортиқ фильмда суратга тушган санъаткор 78 ёшида вафот этганди.