Улар қандайдир намойишлар уюштиришга уринмоқда – Тўқаев қозоқ ва ўзбек бойларини таққослади

Қозоғистонда йирик бойлик орттирган шахслар бугунги кунда мамлакатнинг зиёнига ишлашга ҳаракат ва харажат қиляпти. Бу ҳақда мамлакат Президенти Қосим-Жомарт Тўқаев “Хабар 24” телеканалига берган интервьюсида айтиб ўтди.

Суҳбат чоғида Қозоғистон раҳбари Қосим-Жўмарт Тўқаев қозоғистонлик олигархлар ҳақидаги фикрларини билдирган.

“Мазкур резолюция (Европа парламенти) лоббичилар томонидан айтиб турилган. Лоббичилар бир пайтлар мамлакатимизда катта пул ишлаб кейин Қозоғистонни тарк этганларнинг буйруғи билан ишлайди. Ҳозир эса улар қандайдир намойишлар уюштиришга, одамлар билан “ўйин қилишга“, “қанчалик ёмон бўлса, шунча яхши” деган тамойил асосида иш олиб боришга эришмоқда“, дейди Қозоқ етакчиси.

Президент Тўқаев эксклюзив интервьюсида ўзбек ва қозоқ олигархларини солиштирган.

“Шу нуқтаи назардан, Ўзбекистондан ташқарида кўп пул ишлаб топган ўзбекистонлик бойлар ўз тарихий ватанларига келиб, Ўзбекистон Президентидан ўзбек халқи учун нима қилишлари мумкинлиги ҳақида кўрсатмалар беришини сўрамоқда. “Ўзбек халқи учун нима қилишимиз мумкин, қандай ёрдам бероламиз?“. Ва ўз пулларига шифохоналар қуришмоқда, инфраструктура барпо этишмоқда. Мана шунда шартли ўзбек олигархлари ва бизнинг олигархларнинг фарқи яққол кўзга ташланади. Бизникилар Қозоғистонда туриб, айниқса, чет элдан ўз мамлакатига “ҳужум қилишмоқда”, дейди Тўқаев.

Маълумот учун, Тўқаев давлат телеканалига берган интервьюсида тартибсизликлар вақтида Олма-ота аэропорти нега эгалланганини ҳам айтган. Шунингдек, у Биринчи Президент Нурсултон Назарбоев билан ваколатлар учун савдолашгани ҳақидаги гап-сўзларга муносабат билдирган.