Тўқаев Ўзбекистонга келади

Қозоғистон Президенти Қосим-Жомарт Тўқаев жорий йил охирида қатор давлатларга, жумладан, Ўзбекистонга ҳам ташриф буюради. Бу ҳақда у бугун, 8 сентябрь куни халққа йўллаган мурожаатида эълон қилди.

Қозоғистон Президенти, шунингдек, Нью-Йоркда БМТ Бош Ассамблеясининг юбилей сессиясида нутқ сўзлайди.

“Йил охирида менинг Россия ва Ўзбекистонга ташрифларим бўлиб ўтади, биз Озарбайжон, Арманистон, Туркманистон раҳбарларини Остонада қабул қилишга тайёргарлик кўряпмиз, қатор Осиё ва Европа мамлакатлари раҳбарлари билан учрашув ва музокаралар режалаштирилган”, дейди Қосим-Жомарт Тўқаев.

Шунингдек, Президент Қозоғистон-АҚШ мулоқоти фаол ривожланаётганини ва Европа Иттифоқи билан кўп қиррали алоқаларни алоҳида таъкидлаган. Бундан ташқари, Тўқаев Иккинчи жаҳон уруши якунларининг “асосий институцион ифодаси”га айланган БМТнинг 80 йиллиги санасини ҳам эслатиб ўтган.

“БМТ ҳанузгача ўз муқобилига эга эмас ва Қозоғистон фикрига кўра, барча долзарб халқаро муаммоларни адолатли ҳал этиш учун асосий музокара майдончаси бўлиб хизмат қилиши керак”, дейди Президент.

Қозоғистон раҳбари, энг аввало, унинг асосий органи – Хавфсизлик Кенгашини ислоҳ қилиш зарурлиги “пишиб етилганини” қайд этган.

“Яқинда Нью-Йоркда БМТ Бош Ассамблеясининг юбилей сессиясида нутқ сўзлашни режалаштиряпман, унда Қозоғистоннинг халқаро вазият бўйича қарашларини, жумладан, Бирлашган Миллатлар Ташкилотини ислоҳ қилиш бўйича таклифларни тақдим этаман”, дея қўшимча қилган Тўқаев.

Эслатиб ўтамиз, аввалроқ Тўқаев бугунги мурожаатида республикада икки палатали парламентдан бир палатали парламентга ўтиш учун парламент ислоҳотини ўтказишни таклиф қилгани ҳақида хабар берилган эди.