Трампнинг қудаси Саркози билан қамоқда учрашишни сўраган – ОАВ

north_east

Франция собиқ президенти Каддафийнинг молиявий ишида айбдор деб топилди

АҚШнинг Франциядаги элчиси Чарльз Кушнер яқинда қисқа муддатга қамоққа жўнатилган Франциянинг собиқ президенти Николя Саркози билан қамоқхонанада учрашиш учун рухсат сўраган ва суд унга бундай учрашувга рухсат берган. Бу ҳақда Париж апелляция судидаги манбасига таяниб, “Reuters” хабар берди. 

Манбанинг айтишича, учрашув қамоқда рўй бермаган, Кушнер ва Саркози қамоқдан ташқарида учрашган. АҚШ Давлат департаменти спикери Кушнер “Саркозига собиқ давлат раҳбари сифатида бўлган шахсий раҳм-шафқати ва ҳурмати туфайли уни кўришга боришни истаган, у АҚШнинг яхши дўсти бўлиб келган”, деб айтди.

Саркози 2007–2012 йилларда Франция президенти бўлган, у ўтган ой Ливиядан маблағ йиғишда тил бириктирганлик айби билан қамоққа ҳукм қилинганидан 3 ҳафта ўтиб, апелляция юритилгани сабабли озод қилинди. У айбловларни доим инкор қилиб келади.

Кушнер эса АҚШ Президенти Дональд Трамп қудаси ҳисобланади – унинг ўғли Жаред Кушнер Трампнинг қизи Иванкага уйланган. Кушнер бир вақтлар АҚШда ноқонуний сайлов кампанияси маблағларини йиғиш ва солиқ тўлашдан бўйин товлаш каби айблари учун қамалган. У 2020 йилда Трамп томонидан афв этилган.

Трамп ва унинг маъмурияти Европадаги консерватив сиёсатчиларни қўллаб-қувватлашга интилган, уларнинг суд ишларини “сиёсийлашган судьялар томонидан қўлланилаётган ҳуқуқ қуроли”, деб талқин қилган ҳолда уларни ҳокимиятдан четлатиш мақсадида қасддан босим ўтказилаётганини айтган.

Трамп бу йил бошида суд томонидан коррупцияда айбланиб, 2027 йилги сайловда қатнашишдан маҳрум этилган ўта ўнгчи сиёсатчи Марин Ле Пенни ҳам “ҳуқуқ қуроли қурбони” дея атаган. “Reuters” хабар беришича, шундан кейин АҚШ Давлат департаменти делегацияси Ле Пен жамоаси билан учрашган, аммо улар таклиф этилган кўмакни рад этган.

Саркозига яқин манба, Кушнер билан бўлган учрашув ҳақида қўшимча маълумот беришдан бош тортиб, фақатгина собиқ президент бу воқеа ҳақида келаси ҳафта чиқадиган “Қамоқхонанинг ёзувлари” номли китобида ёзишни режалаштираётганини айтган.

Кушнер бу йил Парижга элчи сифатида келганидан бери кўп баҳс-мунозараларга сабаб бўлмоқда. Август ойида у очиқ хатда Францияда антисемитизмга қарши етарлича чора кўрилмаётганини айтиб, Президент Эммануэль Макронни танқид қилганидан кейин Франция Ташқи ишлар вазирлигига чақирилган.