Саркози қамоқхонадан уйига қайтди

Аввалроқ, Париж аппеляция суди прокурорнинг таклифи билан Франциянинг 5 йилга қамалган собиқ президенти Николя Саркозини қамоқдан озод қилиш ҳақида қарор қабул қилгани ҳақида хабар берилганди. Саркози суд қароридан сўнг қамоқхонани тарк этган ва ўз уйига борган. Бу ҳақда BMFTV хабар берди.

Телеканалга кўра, Франция собиқ президенти Париждаги Ла-Санте қамоқхонасидан суд назорати остида озод этилгач, унинг машинаси Парижнинг 16-округидаги уйига етиб борган.

“Собиқ Республика президенти (Саркози) ўз уйига етиб келди”, дейилади хабарда.

Эслатиб ўтамиз, жорий йилнинг 21 октябрь куни Саркози 2007 йилги сайлов кампаниясининг Ливия томонидан ноқонуний молиялаштирилгани иши бўйича Париждаги қамоқхонага жойлаштирилган эди. У қамоққа олиниши олдидан берган сўнгги баёнотида “панжара ортига собиқ президентни эмас, балки айбсиз одамни қамашяпти”, деган.

Бугун, 10 ноябрь куни Париж апелляция суди Франция собиқ президентининг адвокатлари томонидан билдирилган илтимосни ҳамда прокуратура вакилининг таклифини қаноатлантириб, уни қамоқдан озод қилиш ва суд назорати остига олиш тўғрисида қарор чиқарди. Шартларга кўра, у Франция ҳудудини тарк эта олмайди. Суд, шунингдек, унинг аввалги қамоққа олиниши асоссиз бўлганини қайд этган.