Трамп ва Хегсет ўртасида даҳанаки жанг бўлди – WP

АҚШ Президенти Дональд Трамп Эрон билан уруш фонида ўқ-дорилар танқислиги сабабли Пентагон раҳбари Пит Хегсетдан тушунтириш беришни талаб қилди. Бу ҳақда икки манбасига таяниб, “The Washington Post” хабар берди.

Уларнинг сўзларига кўра, ўтган ҳафтада Кэмп-Дэвидда бўлиб ўтган Вазирлар Маҳкамаси йиғилишида Трамп Хегсетдан нима учун ўқ-дориларнинг кескин етишмовчилиги борасида чалғитилганини тушунтириб беришни сўраган. Президент танқислик муаммоси аллақачон ҳал қилинган деб ҳисоблаган бўлган.

Бунга жавобан Пентагон раҳбари, нашр суҳбатдошларининг айтишича, ўзини ҳимоя қилиб, масъулиятни ўз ўринбосари Стивен Файнбергга ағдаришга уринган.

Оқ уй матбуот котиби Кэролайн Левитт “The Washington Post” манбаларининг гапларини “фейк” деб атаган. 

“Бундай нарса умуман бўлмаган. Президент Трамп Хегсетга тўлиқ ишонади”, дея қўшимча қилган у.

Пентагон ҳам Трамп ва Хегсет ўртасидаги даҳанаки жанг, шунингдек, АҚШда ўқ-дорилар танқислиги ҳақидаги хабарларни “уйдирма” деб атаган. АҚШ етакчисининг ўзи снарядлар етишмовчилиги ҳақидаги хабарларга изоҳ берар экан, мамлакатда “ўқ-дориларнинг улкан заҳиралари” борлигини яна бир бор таъкидлаган. Унинг сўзларига кўра, ҳозирда бу каби маълумотларни тарқатаётганлар қидирилмоқда.

Қайд этиш жоиз, Пит Хегсет Эронга қарши ҳарбий ҳаракатларнинг асосий тарафдорларидан бири ҳисобланади. “The Washington Post”нинг ёзишича, у Дональд Трампни Теҳрон устидан қозониладиган ғалаба тез ва нисбатан енгил бўлишига ишонтирган. Бироқ февраль ойида бошланган уруш ҳанузгача давом этмоқда.

Эслатиб ўтамиз, июль ойи охири – август ойи бошида АҚШ Эронни бомбардимон қилишни вақтинча тўхтатди. Трамп бундай қарор музокаралардаги илгарилаш фонида қабул қилинганини тушунтирди. Америка ОАВлари манбалари эса зарбалардан воз кечишнинг ҳақиқий сабаби АҚШ Эрон билан урушда деярли барча ракета заҳирасини ишлатиб бўлганида деб таъкидламоқда.