Трамп Хитойга божларни 90 кунга кечиктирди

north_east

АҚШ янги божлар ва янги муддатни эълон қилди

АҚШ Президенти Дональд Трамп Хитойдан келадиган товарларга божлар жорий этишни яна 90 кунга кечиктирди. У тегишли фармонни кеча, 11 август куни имзолади. Бу ҳақда Оқ уй вакилига таяниб, CNBC ва “The Washington Post” хабар берди.

Таъкидланишича, тарифлар бугун, 12 август куни кучга кириши керак эди, бироқ Трамп ўз фармони билан буни ноябрь ойининг ўрталарига кўчирди.

“Бу кечикиш АҚШ савдо вакиллари ва уларнинг хитойлик ҳамкасблари ўртасидаги июль ойи охирида Стокгольмда бўлиб ўтган музокараларнинг сўнгги раундининг кутилган натижаси эди”, деб тушунтиради CNBC.

Журналистларнинг аниқлик киритишича, агар муддат узайтирилмаганида, Хитойга нисбатан тарифлар АҚШ томонидан 145 фоизга ва Пекин томонидан 125 фоизга кўтарилган 2025 йил апрель ойидаги энг юқори даражага қайтган бўларди.

2025 йил май ойида АҚШ ва Хитой 90 кунлик ўзаро тарифларни мос равишда 30% ва 10% гача камайтиришга келишиб олди. Июнь ойи охирида Дональд Трамп Хитой билан Америка бизнеси учун “Хитойни очишни бошлаш”га мўлжалланган савдо шартномаси имзоланганини эълон қилди.

Кейинроқ Пекин келишув фактини тасдиқлади ва Вашингтон ўз доирасида Хитой учун бир қатор чекловларни олиб ташлашга рози бўлганини тушунтирди.

Эслатиб ўтамиз, ўтган ойда АҚШ Президенти ва Еврокомиссия раҳбари Урсула фон дер Ляйен Турнберидаги учрашувда Европа Иттифоқи товарларига 15 фоизлик божлар жорий этишни назарда тутувчи савдо битими бўйича келишиб олганди. Америка раҳбарининг сўзларига кўра, ЕИ ушбу савдо битими доирасида АҚШ иқтисодиётига 600 миллиард доллар миқдорида қўшимча сармоя киритишни ҳам ваъда қилган. Бундан ташқари, Брюссель АҚШдан 750 миллиард долларлик энергия ресурсларини сотиб олади.