Трамп ЕИ билан савдо битими тузилганини эълон қилди

АҚШ Евроиттифоқ билан савдо битими тузди. Бу ҳақда кеча, 27 июль куни АҚШ Президенти Дональд Трамп Шотландияда Еврокомиссия раҳбари Урсула фон дер Ляйен билан суҳбатдан сўнг эълон қилди.

Унинг сўзларига кўра, Евроиттифоқ АҚШдан 750 миллиард долларлик энергия ресурсларини харид қилишга ва АҚШ иқтисодиётига яна 600 миллиард доллар сармоя киритишга рози бўлган. Шунингдек, Брюссель “жуда катта миқдорда” ҳарбий техника харид қилади.

Маълумот учун, мазкур келишув Евроиттифоққа Трамп жорий йилнинг 1 августидан жорий қилмоқчи бўлган 30 фоизлик бож тўловларидан қочиш имконини беради. Келишув доирасида АҚШ Евроиттифоқдан келадиган импортнинг катта қисмига, жумладан, автомобилларга 15 фоизлик бож жорий қилади. Бунгача эса Евроиттифоқдан АҚШга машина ва автомобиль эҳтиёт қисмлари импортига 25 фоизлик бож қўлланилар эди.

“Брюссель эса АҚШ экспорти учун божсиз бозор очади”, дейди Трамп.

АҚШ Президенти бу келишувни “энг йирик келишув” деб атаган. Урсула фон дер Ляйен эса бу битим барқарорликка олиб келишини айтган. АҚШ Савдо вазири Говард Лютник эса Евроиттифоқдан чиплар ва дорилар импортига бож тўловлари бўйича қарор тахминан икки ҳафтада қабул қилинишини билдирган.

Қайд этиш жоиз, томонлар баҳор ойларидан буён савдо битими бўйича музокаралар олиб бораётган эди. Ўшанда Трамп деярли 200 та давлатга бож тўловлари жорий этилишини эълон қилганди. Евроиттифоқ учун бу ставка 20 фоиз бўлиши керак эди. Бунгача АҚШ Евроиттифоқдан пўлат ва алюминий импортига 25 фоизлик бож жорий қилган, кейинчалик эса бу тарифлар икки баравар оширилган эди.

Эслатиб ўтамиз, аввалроқ Дональд Трамп Шотландияга боргани ва Глазго Прествик аэропортида журналистлар билан учрашувда европаликларни шамол турбиналаридан воз кечишга ва миграцияни тўхтатишга чақиргани хабар қилинган эди.