Трамп 80 дан ортиқ давлатларга янги бож тарифларини жорий қилди

АҚШ Президенти Дональд Трамп 80 дан ортиқ давлатдан импорт қилинадиган маҳсулотларга нисбатан янги бож ставкаларини жорий қилди. Бу ҳақда “The Guardian” хабар берди.

Маълум қилинишича, янги тарифлар бугун, 24 июль куни муддати тугаган 10 фоизлик глобал бож ўрнини эгаллайди. АҚШ Савдо вакили Жеймисон Грир эълон қилган қарорга кўра, Буюк Британия, Канада, Мексика, Австралия, Ҳиндистон, Хитой ҳамда Европа Иттифоқининг 27 давлати қаторида яна ўнлаб мамлакатлардан импорт қилинадиган маҳсулотларга 10 ёки 12,5 фоизлик божлар жорий этилган.

Қайд этилишича, янги тарифлар 1974 йилдаги Савдо тўғрисидаги қонуннинг 301-бўлими асосида кучга киритилган. Мазкур норма мажбурий меҳнатдан фойдаланган ҳолда ишлаб чиқарилган маҳсулотларга қарши савдо чораларини қўллаш имконини беради. Грирнинг айтишича, АҚШ қарийб бир асрдан буён мажбурий меҳнат маҳсулотлари импортини тақиқлаб келмоқда ва савдо ҳамкорлари ҳам шундай чораларни жорий этиши лозим.

Янги божлар АҚШнинг қатор иттифоқчилари ва савдо ҳамкорлари томонидан танқид қилинмоқда. Австралия ва Бразилия уларни асоссиз деб баҳолаб, бекор қилинишига эришишга ҳаракат қилишини билдирган. Норвегия Ташқи ишлар вазирлиги эса янги божлар учун асос йўқлигини билдирган. Европа Иттифоқининг ташқи сиёсат бўйича олий вакили Кая Каллас Брюссель Вашингтондан расмий изоҳ сўрашини айтиб, ЕИ трансатлантик савдо келишуви бўйича ўз мажбуриятларини бажарганини таъкидлаган. Канада эса мажбурий меҳнат маҳсулотларига қарши курашда етакчи давлатлардан бири эканини билдириб, ўзига нисбатан бундай чоралар қўлланмаслиги кераклигини маълум қилган.

Жорий йилнинг февраль ойида АҚШ Олий суди Дональд Трамп томонидан аввал жорий этилган божларнинг катта қисмини ноқонуний деб топган эди. Суд Конституцияга кўра божларни жорий этиш ваколати Конгрессга тегишли эканини билдирган. Шундан сўнг, Трамп маъмурияти бошқа ҳуқуқий механизм асосида 150 кун амал қиладиган вақтинчалик божларни жорий қилган. Уларнинг муддати бугун, 24 июль куни якунланди.

Халқаро савдо бўйича эксперт, Жаҳон савдо ташкилоти бош директорининг собиқ ўринбосари Алан Вольф президентнинг янги божларни мустақил жорий этиш ваколати ҳам шубҳа остида эканини билдириб, ушбу тарифлар судга оширилса, Олий суд уларни ҳам бекор қилиши мумкинлигини қайд этган.

Эслатиб ўтамиз, аввалроқ АҚШ Президенти Дональд Трамп Канададан импорт қилинадиган қарийб 20 миллиард долларлик маҳсулотларга 50 фоизлик янги божлар жорий этилганини эълон қилган эди.