“Сув йўқ, электр йўқ”. Куба аҳолиси яна зулматда қолди

Кубада электр тармоғи яна тўлиқ узилди, орол бўйлаб миллионлаб одамлар электрсиз қолди. Жорий йилнинг январь ойидан буён мамлакатда электр тармоғининг тўлиқ ёки қисман ишдан чиқиши камида 6 марта кузатилди. Бу ҳақда “Associated Press“ хабар берди.

Электр таъминотидаги узилиш кеча, 18 сентябрь куни маҳаллий вақт билан соат 14:00 атрофида мамлакатнинг марказий ва ғарбий қисмидаги юқори кучланишли электр узатиш линияларида юзага келган носозлик ортидан бошланган. Носозлик дастлаб ҳудуддаги электр тизимининг, жумладан, Матансас провинциясигача бўлган қисмининг қулашига сабаб бўлган, шундан сўнг оролнинг шарқий қисми ҳам электр тармоғидан узилиб қолган.

Куба Энергетика ва конлар вазирлиги электр таъминотини тиклаш бўйича протоколлар ишга туширилганини маълум қилган. Куба Миллий электр иттифоқи вакили Феликс Эстрада ҳам тизимни босқичма-босқич тиклаш ишлари бошланганини билдирган.

Кечга бориб Гаванадаги электр истеъмолчиларининг атиги 5 фоизига электр қайта етказиб берилган. Расмий маълумотларга кўра, пойтахтда жами 862 мингга яқин электр истеъмолчиси бор. Камагуэй, Пинар-дель-Рио ва Гранма провинцияларида электр таъминотини тиклаш учун кичик “микро-ороллар” ташкил этилган. Шифохоналар ва бошқа шошилинч хизмат кўрсатиш объектларини электр билан таъминлайдиган айрим тизимлар ҳам қайта ишга туширилган.

Гаванада эса шаҳарнинг катта қисми кечгача қоронғуликда қолган. Айрим ҳудудларда, асосан шифохоналар атрофида электр таъминоти тикланган.

“Бу доимий электр узилишларига ҳеч ким чидай олмайди. Озиқ-овқат етарли эмас, сув йўқ, электр йўқ – биз нималарни бошдан кечираётганимизни тасаввур ҳам қила олмайсиз. Мамлакат жуда аянчли аҳволга тушиб қолди”, деган Гаванада яшовчи 60 ёшли Мерседес Родригес.

Электр тармоғининг беқарор ҳолатини ноқулай об-ҳаво шароити ҳам янада оғирлаштиргани айтилмоқда.

Кубанинг эскирган электр ишлаб чиқариш тизими йиллар давомида ёнилғи танқислиги ва инфратузилманинг яроқсизлиги сабаб жиддий босим остида қолиб келмоқда. АҚШнинг январь ойида Кубага нисбатан жорий қилган энергетика чекловлари эса вазиятни янада оғирлаштирган.

Мазкур чекловлар Куба иссиқлик электр станцияларини ишлатиш учун зарур ёнилғи ҳамда эскирган инфратузилмани таъмирлаш учун керак бўладиган эҳтиёт қисмларни импорт қилишини қийинлаштирган. Шундан буён Кубага фақат бир марта ёнилғи ташувчи танкер етиб келган – у март ойида Россиядан юборилган.

Эслатиб ўтамиз, Кубада жорий йил бошидан буён бир неча бор блэкаутлар юз берган. Хусусан, жорий йилнинг 17 март куни Кубада тахминан 10 миллион киши электрсиз қолган. Шунингдек, 21 март куни электр энергияси бутунлай ўчиб қолган. Бундан ташқари, 6 июль куни Кубада бутун мамлакат бўйлаб электр энергияси узилиб, оқибатда қарийб 10 миллион аҳоли электр таъминотидан узилган. Шу билан бирга, 10 июль куни тўртинчи бор бутун мамлакат бўйлаб электр энергияси бутунлай ўчиб қолган. Жорий йилнинг 2 август куни соат 22:43 да эса мамлакат миллий электр энергетикаси тизими тўлиқ ўчиб қолган.