Кубада блэкаут: мамлакат яна зулматда қолди

Кеча, 6 июль куни Кубада бутун мамлакат бўйлаб электр энергияси узилиб, оқибатда қарийб 10 миллион аҳоли электр таъминотисиз қолди. Бу ҳақда “Associated Press” хабар берди.

Қайд этилишича, мамлакатнинг давлатга қарашли Unión Eléctrica энергетика компанияси электр узилиши юз берганини тасдиқлаб, Х’да ҳодиса сабаблари ўрганилаётганини қўшимча қилган. Кубанинг Энергетика ва кончилик вазирлиги эса электр таъминотини босқичма-босқич тиклаш ишлари бошланганини билдирган.

Расмийларга кўра, мамлакатда январь ойидан буён ёнилғи танқислиги кузатилмоқда. Ўшанда АҚШ Президенти Дональд Трамп Кубага нефть етказиб берувчи давлатларга нисбатан тарифлар жорий этиш билан таҳдид қилганди, оқибатда бу мамлакатнинг иқтисодий ва молиявий ҳолатини янада кучайтирган. Ёнилғи инқирози сабаб оролда жамоат транспорти фаолияти кескин қисқарган, шунингдек, шифохоналарда ўн минглаб режалаштирилган операциялар бекор қилинган.

Маълумотларга қараганда, Куба ички ишлаб чиқариш ҳисобига ўзининг ёнилғига бўлган эҳтиёжини атиги 40 фоизини қоплай олади. Март ойида Россиядан етказиб берилган 730 минг баррель нефть захираси эса апрель охирига бориб тугаган.

Мамлакатда сўнгги ойларда электр энергияси билан боғлиқ узилишлар мунтазам кузатилмоқда. Май ойида йирик авария Кубанинг шарқий вилоятларига таъсир қилган бўлса, март ойида икки марта бутун мамлакат электр таъминотисиз қолган эди. Ўшанда узилишлардан бири Нуэвитас иссиқлик электр станциясидаги генератор носозлиги сабаб юз берганди.

Давом этаётган иқтисодий инқироз фонида Куба ҳукумати июнь ойида кенг кўламли иқтисодий ислоҳотларни бошлади. Парламент сўнгги 65 йил ичидаги энг йирик хусусийлаштириш дастурини маъқуллаб, хусусий бизнес ва банклар фаолиятини кенгайтиришга рухсат берди.

Президент Мигель Диас-Канель мазкур ислоҳотлар АҚШ билан олиб борилаётган музокараларга боғлиқ эмаслигини таъкидлаган.

Эслатиб ўтамиз, жорий йилнинг 4 июнь куни АҚШ Президенти Дональд Трамп маъмурияти санкциялар рўйхатини кенгайтириб, унга Куба Президенти Мигель Диас-Канель ҳамда унга алоқадор шахслар ва компаниялар киритгани ҳақида хабар берилганди.