АҚШ Куба Президентини “қора рўйхат”га тиқди

Кеча, 4 июнь куни АҚШ Президенти Дональд Трамп маъмурияти санкциялар рўйхатини кенгайтирди. Унга Куба Президенти Мигель Диас-Канель ҳамда унга алоқадор шахслар ва компаниялар киритилди. Бу ҳақда Америка Молия вазирлигининг пресс-релизида сўз боради.

Санкциялар рўйхатига Куба Президентининг ўзидан ташқари, унинг оила аъзолари, хусусан, рафиқаси Лис Куэста ҳам киритилган. Кубанинг биринчи хоними бундай рўйхатда бўлиш у учун “ўзига хос шараф” эканлигини ёзиб қолдирган ва бу каби босимни “бемаънилик ва аҳмоқлик” деб атаган.

Шунингдек, чекловлар остига Рауль Кастронинг ўғли Алехандро Кастро Эспин ва кубалик инқилобчининг набираси Алехандро Кастро Калис ҳам тушган. Ташкилотлар орасида Инқилобни ҳимоя қилиш қўмитаси, Куба Инқилобий қуролли кучлар вазирлиги (MINFAR) ва бошқалар бор.

АҚШ Давлат котиби Марко Рубио ўзининг X’даги саҳифасида Оқ уй АҚШнинг “миллий хавфсизлигига таҳдид солишни” мақсад қилган ҳамда ўзларининг “заҳарли ва ёвуз “инқилобини” бутун дунёга экспорт қилаётган радикал марксистик режимларга бундан буён тоқат қилмаслигини” ёзган.

“Вашингтоннинг Диас-Канелга нисбатан ушбу ҳаракатлари орол-давлатнинг коммунист раҳбарларига босимни кучайтиришдаги навбатдаги қадамидир”, деб ёзади “Reuters”. 

Шу йилнинг май ойида Қўшма Штатлар Кубанинг собиқ раҳбари, 94 ёшли Рауль Кастрога нисбатан айблов эълон қилган эди. Уларнинг орасида АҚШ фуқароларини ўлдириш мақсадида тил бириктириш эпизоди ҳам бор эди.

Гаванага нисбатан босим ўтган йилнинг охиридан, яъни Америка кучлари Кубага кетаётган Венесуэла нефти ортилган кемани қўлга киритганидан сўнг кучайди. Венесуэла раҳбари Николас Мадуро қўлга олинганидан кейин АҚШ маъмурияти оролга ёнилғи етказиб беришни тўхтатишни талаб қилди ва Кубага нефть етказиб берувчи мамлакатларга нисбатан божхона тўловлари жорий этиш билан таҳдид қилди. Бу, масалан, Мексика томонидан экспортнинг тўхтатилишига ва давлатда ёнилғи тақчиллигига олиб келди.

Президент Дональд Трамп маъмурияти амалда ёнилғи блокадасини жорий этди. Президент, шунингдек, Венесуэлада Николас Мадуро ҳокимиятдан ағдарилганидан кейин навбатдагиси Куба раҳбари бўлиши мумкинлигига бир неча бор шама қилган эди.

Эслатиб ўтамиз, аввалроқ АҚШ Кубанинг собиқ президенти Рауль Кастрога нисбатан қотиллик айбловларини эълон қилгани ҳақида хабар берилган эди.