Трамп Куба ҳукумати қулашини айтди

АҚШ Президенти Дональд Трамп Кубадаги ҳокимият тизими Америка администрациясининг босими остида қулашини айтди. Бу ҳақда у  кеча, 22 сентябрь куни Нью-Йоркда ўтаётган БМТ Бош Ассамблеясидаги чиқиши чоғида гапирди.

“Менинг администрациям Кубадаги вазиятда туб ўзгаришларни хоҳлайди, у ерда коммунистик режим ўз тарихидаги энг катта, ҳайбатли босим остида қолмоқда. Бу мутлақо барбод бўлган давлатдир. У илгари ҳеч қачон бўлмагандек парчаланиб бормоқда ва у қулайди”, дейди Трамп.

Америка Президентининг сўзларига кўра, Давлат котиби Марко Рубио Куба билан музокаралар олиб бормоқда. 

“У Куба билан музокараларга бутунлай шўнғиган. Келинг, бундан нима чиқишини кўрайлик”, дейди Трамп. 

Кубалик дипломатлар АҚШ президентининг Кубага босим ҳақидаги сўзларидан сўнг БМТ Бош Ассамблеяси залини тарк этган.

Маълумот учун, бу йил АҚШ Кубага қарши санкцияларни кенгайтирди – орол-давлатга нефть етказиб берувчи мамлакатлар учун божлар жорий этди, бунинг оқибатида Кубада энергетик инқироз юзага келди. Дональд Трамп Кубада давлат тузумини ўзгартиришга эришишга ҳаракат қилаётганини очиқ айтиб келади. Америка ОАВлари эса АҚШнинг Кубада ҳарбий операцияга тайёргарлик кўраётгани ҳақида бир неча бор ёзган.

Эслатиб ўтамиз, аввалроқ Куба Президенти Мигель Диас-Канель АҚШ маъмуриятини мамлакатга қарши нефть эмбаргоси ва кучайтирилган санкциялар сиёсати орқали “сиёсий геноцид” юритаётганликда айблаганди.