Кубада блэкаут: мамлакат бешинчи бор зулматда қолди

Кубанинг миллий энергетика тизими яна тўлиқ ишдан чиқди. Бу ҳақда мамлакатнинг давлат электр энергетикаси компанияси X ижтимоий тармоғидаги саҳифасида маълум қилди.

Компаниянинг ёзишича, кеча, 2 август куни соат 22:43 да мамлакат миллий электр энергетикаси тизими тўлиқ ўчиб қолган.

Куба Энергетика вазирлиги электр тармоғини қайта ишга тушириш бўйича зарур чоралар кўрилаётганини маълум қилган.

Шунингдек, сўнгги вақтларда мамлакатда кузатилаётган электр узилишлари сув таъминоти ва совутиш тизимларига ҳам салбий таъсир кўрсатиб, аҳоли ҳаётини сезиларли даражада қийинлаштирган.

Маълум қилинишича, Куба 2024 йил охиридан буён мунтазам равишда йирик электр узилишлари билан тўқнаш келмоқда. Мамлакат ҳукумати энергетика инқирозини ёқилғи танқислиги, инфратузилманинг эскиргани ҳамда АҚШ санкциялари оқибатлари билан изоҳламоқда.

Қайд этилишича, Куба электр энергиясининг асосий қисмини эскирган мазутда ишловчи иссиқлик электр станцияларида ишлаб чиқаради. Мамлакат илгари асосий ёқилғи етказиб берувчи бўлган Венесуэладан нефть олиш имкониятидан АҚШ томонидан жорий этилган нефть блокадаси ортидан маҳрум бўлган.

Шу билан бирга, кейинчалик Кубанинг асосий нефть етказиб берувчисига айланган Мексикадан импорт ҳам АҚШ босими сабаб тўхтатилган. Март ойида Россиядан АҚШ рухсати билан юборилган битта танкер олиб келган ёқилғи захиралари эса аллақачон тугаган.

Бундан ташқари, Куба ўнлаб йиллардан буён АҚШнинг кенг қамровли иқтисодий чекловлари остида қолмоқда. Президент Дональд Трамп маъмурияти Куба давлат корхоналарига нисбатан санкцияларни янада кучайтирган. Оқибатда қатор хорижий компаниялар мамлакатдаги фаолиятини тўхтатган.

Эслатиб ўтамиз, Кубада жорий йил давомида 4 марта тўлиқ блекаут содир бўлган. Хусусан, жорий йилнинг 17 март куни Кубада тахминан 10 миллион киши электрсиз қолган. Шунингдек, 21 март куни Кубада электр энергияси бутунлай ўчиб қолган. Бундан ташқари, 6 июль куни Кубада бутун мамлакат бўйлаб электр энергияси узилиб, оқибатда қарийб 10 миллион аҳоли электр таъминотидан узилган. Шу билан бирга, 10 июль куни тўртинчи бор бутун мамлакат бўйлаб электр энергияси бутунлай ўчиб қолган.