Сунъий интеллектда Эрдўғаннинг суратини ясаган эркак ҳибсга олинди (фото)

Туркия ҳуқуқни муҳофаза қилиш органлари Анқарада яшовчи фуқарони сунъий интеллект ёрдамида мамлакат Президенти Ражаб Тойиб Эрдўғаннинг суратини  ясагани учун қўлга олди. Бу ҳақда “Cumhuriyet” хабар берди.

Нашрга кўра, полиция ходимлари Анқарада сунъий интеллект ёрдамида Ражаб Тойиб Эрдўған ва Адлия вазири Акин Гюрлек иштирокидаги фотосуратларни ясаган эркакни ушлаган. Полиция талқинига кўра, эркак ушбу фотоларни ижтимоий тармоқларда тарқатган.

“Гумонланувчи WhatsApp статусига Президент Ражаб Тойиб Эрдўған ва Адлия вазири Акин Гюрлек билан тушган, шунингдек, тахминларга кўра, сунъий интеллектдан фойдаланган ҳолда яратилган ўз фотосуратларини жойлаштирган”, дейилади Анқара прокуратураси хабарида.

Терговнинг ҳисоблашича, қўлга олинган шахс шу йўл билан ўзида юқори мартабали мулозимлар билан алоқалар мавжудлиги ҳақида таассурот уйғотган бўлиши мумкин. Тергов ҳаракатлари нуфузни суистеъмол қилиб савдолашиш ҳамда хавотир, қўрқув ёки ваҳима келтириб чиқариш мақсадида ёлғон маълумотларни ошкора тарқатиш гумони бўйича олиб борилмоқда.

Эслатиб ўтамиз, аввалроқ 2016 йил 15 июлдаги давлат тўнтаришига уриниш вақтида Ражаб Тойиб Эрдўғанга суиқасд уюштиришда иштирок этганликда айбланаётган, халқаро қидирувда бўлган Б.К. исмли шахс қўлга олинганди.