Стубб Трампни саунага таклиф қилди (видео)

Финляндия Президенти Александр Стубб АҚШ Президенти Дональд Трампга бирга саунага бориб, Гренландия атрофидаги вазиятни муҳокама қилиш таклифини берди. Бу ҳақда у “The Washington Post” нашрига берган интервьюсида гапирди.

“Баъзан бироз тўхтаб олиш фойдали. Биласизми, саунага бориш, яхшилаб буғланиш, кейин эса ечим топиш керак. Гольф дипломатиясидан сауна дипломатиясига. Нега энди йўқ?” дейди Стубб.

Стубб ўзини “бошдан-оёқ фин” деб атар экан, баъзан муҳим қарорларни айнан саунада яхшилаб буғланиб чиққандан кейин қабул қилишини айтган. Шунингдек, у Давосда бўлиб ўтадиган Жаҳон иқтисодий форуми доирасида “анчайин мураккаб вазият”ни ҳал қилишга умид билдирган.

Маълумот учун, сауна дипломатияси – бу Финляндия ташқи сиёсатига хос бўлган норасмий мулоқот усули бўлиб, унда муҳим сиёсий музокаралар ва дипломатик учрашувлар сауна (иссиқ ҳаммом) ичида ўтказилади. Сауна дипломатияси, айниқса, Финляндиянинг собиқ президенти Урхо Кекконен (1956–1982) даврида машҳур бўлган. У совет раҳбарлари, жумладан, Никита Хрушчёв билан саунада музокаралар ўтказиб, Финляндиянинг бетарафлигини сақлаб қолиш ва Ғарб билан яқинлашиш масалаларини ҳал қилган. 

Эслатиб ўтамиз, аввалроқ Дания ва Гренландия Мудофаа вазирлари Гренландияни эҳтимолий таҳдидлардан ҳимоялаш мақсадида НАТО миссиясини (Альянс қўшинларини) Арктика минтақасига жойлаштиришни таклиф қилгани ҳақида хабар берилган эди.