Россияда 15 ёшли қизга тажовуз қилишда гумонланган ўзбекистонлик ушланди

Россиянинг Санкт-Петербург шаҳрида полиция ходимлари 15 ёшли мактаб ўқувчисига тажовуз қилишда гумонланган Ўзбекистон фуқаросини қўлга олди. Бу ҳақда Россия Ички ишлар вазирлигига таяниб, “78.ru” хабар берди.

Қайд этилишича, мактаб ўқувчисига зўравонлик жорий йилнинг 31 май куни кечқурун содир бўлган. 49 ёшли Ўзбекистон фуқароси қизни Кустодиев кўчасидаги болалар майдончасидан олиб кетгани айтилмоқда. Қизнинг бедарак йўқолганини отаси полицияга хабар қилган.

Мактаб ўқувчиси эртаси куни эрталаб Руднев кўчасида топилиб, шифохонага олиб борилган. Шифокорлар унинг бўйнида жароҳатлар аниқлаган. Кўрикдан сўнг жабрланувчи уйига юборилган.

Қизнинг айтишича, мигрант унга нисбатан жинсий характердаги зўравон ҳаракатлар содир этган. Нашрга кўра, ушбу шахс аввалроқ ўлдириш билан таҳдид қилиш айби билан судланган, бироқ унга нисбатан жиноят иши тўхтатилган.

Эслатиб ўтамиз, аввалроқ ҳам Россиянинг Санкт-Петербург шаҳрида ўзбекистонлик эркак аёл кишини зўрлашда гумонланиб, қўлга олинганди. Унга нисбатан Россия Жиноят кодексининг 131-моддаси (зўрлаш) бўйича жиноий иш қўзғатилган.