Россия Украина жанубида бир қанча ҳудудларни бой берди – Расмий Киев

Россия қўшинлари Украина Қуролли Кучлари билан жангларда Николаев ва Херсон вилоятлари чегарасидаги бир нечта аҳоли пунктлари устидан назоратни йўқотди. Бу ҳақда Украина Қуролли Кучлари Бош штабининг ҳисоботида айтилган.

Душман Донецк ва Луганск вилоятлари ҳудуди устидан тўлиқ назорат ўрнатиш ва Украинанинг вақтинча босиб олинган Қрим ороли билан қуруқлик йўлагини ушлаб туриш мақсадида Шарқий оператив зонада ҳужум амалиётларини тўхтатмаяпти.

Қайд этилишича, кеча, 4 май куни Украина ҳимоячилари Донбассда душманнинг 11 та ҳужумини қайтарди, жангларда душманнинг 5 та танки, 7 та зирҳли техникаси ва 5 та машинасини йўқ қилган.

Ҳарбий ҳаво кучлари ва қуруқликдаги кучларнинг ҳаво ҳужумидан мудофаа бўлинмалари тўққизта ҳаво нишонига зарба беришди: тўртта дрон (улардан иккитаси Қуруқликдаги кучларнинг зенит-ракета бўлинмалари томонидан) ва учта душман қанотли ракеталари. Шунингдек, икки самолёт ҳам уриб туширилган. Дастлабки маълумотга кўра, қирувчи Су-30 самолёти.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.