Россия Украианага зарба йўллади. Ўнлаб қурбонлар бор (видео)

Бугун, 2 июнга ўтар кечаси Россия томонидан Украина ҳудудига уюштирилган кенг кўламли ракета ва дрон ҳужумлари оқибатида камида 10 киши ҳалок бўлди, ўнлаб одамлар жароҳат олди. Бу ҳақда BBC хабар берди.

Энг кўп талафот Днепр ва пойтахт Киев шаҳарларида қайд этилган. Украина расмийларининг маълум қилишича, Днепрда 6 киши, Киевда эса 4 киши вафот этган.

Жароҳатланганлар орасида болалар ҳам борлиги айтилмоқда. Тунги ҳужумлар вақтида турар-жой бинолари, инфратузилма объектлари ва саноат ҳудудлари катта зарар кўрган.
Киев шаҳрида ҳужумлар оқибатида кўплаб портлашлар эшитилган, осмонни тутун қоплаган. Шаҳар мэри Виталий Кличко аҳолига ҳаво ҳужуми сигналлари вақтида бошпаналарда қолишни қатъий тавсия қилган. Ҳарбий маъмурият вакиллари эса Россия баллистик ракеталар ва дронлардан фойдаланганини билдирган.

Фавқулодда хизматлар вайрон бўлган бинолар остида қолган фуқароларни қидириш-қутқариш ишларини давом эттирмоқда. Айрим ҳудудларда электр таъминотида узилишлар ҳам кузатилган. Шунингдек, газ станцияси, қурилиш майдончалари ва бир нечта уйлар зарар кўрган.

Харьков ва Запорожье шаҳарларида ҳам ҳужумлар қайд этилган. Харьковда камида 10 киши, жумладан бир бола жароҳатланган, Запорожьеда эса саноат объектига зарба берилган.

Россия томони эса ҳужумларни Украина томонидан амалга оширилган аввалги зарбаларга жавоб сифатида изоҳлаган. Москва илгари Киев ва бошқа стратегик марказларга “тизимли зарбалар” берилиши ҳақида огоҳлантирган эди.

Украина Президенти Владимир Зеленский эса эҳтимолий йирик ҳужумлар ҳақида огоҳлантириб, аҳолига эҳтиёткорликни кучайтиришни маслаҳат берган. У разведка маълумотларига кўра, Россия яна кенг кўламли зарбалар бериши мумкинлигини таъкидлаган.

Сўнгги ҳафталарда Россия Украина шаҳарларига ракета ва дрон ҳужумларини кучайтирган. Бу ҳужумлар тинч аҳоли орасида қурбонлар сонининг ошишига ва инфратузилманинг жиддий шикастланишига олиб келмоқда.

Украина томони эса Россиянинг бу ҳаракатларини “шантаж ва босим” деб атаб, Ғарб давлатларини қўшимча ёрдам ва сиёсий босимни кучайтиришга чақирмоқда.

Аввалроқ, Руминиянинг Галац шаҳрида учувчисиз учиш аппарати кўп қаватли турар-жой биноси устига қулаган. Ҳодиса оқибатида ёнғин келиб чиққан. Бу Россияга тегишли дрон экани тахмин қилинган, чунки айнан ўша пайтда Россия кучлари Украинанинг Одесса вилоятига дронлар билан кенг кўламли ҳужум уюштирган бўлган.