Россия дрони Руминиядаги тураржой биносига бориб урилди (видео)

Бугун, 29 майга ўтар кечаси Руминиянинг Галац шаҳрида учувчисиз учиш аппарати (дрон) кўп қаватли тураржой биноси устига қулади. Ҳодиса оқибатида ёнғин келиб чиққан. Бу ҳақда Руминия Фавқулодда вазиятларга чора кўриш хизмати хабар берди.

Тахминан соат 02:42 атрофида ОАВда Руминиянинг Галац шаҳрида дрон тураржой биносига урилгани ҳақида маълумотлар пайдо бўла бошлаган. Бу Россияга тегишли дрон эканлиги тахмин қилинган, чунки айнан ўша пайтда Россия кучлари Украинанинг Одесса вилоятига (Галац шаҳри ушбу ҳудудга яқин жойлашган) дронлар билан кенг кўламли ҳужум уюштираётган бўлган.

“Дастлабки хабарларга кўра, Россиянинг учувчисиз учиш аппарати Руминиянинг Галац шаҳридаги кўп квартирали уйга келиб урилган. Ҳодиса расмий идоралар “атрофдаги ҳаво маконидан буюмлар қулаши эҳтимоли” ҳақида огоҳлантириш эълон қилганидан кўп ўтмай юз берган”, деб ёзади “Faytuks Network” нашри.

Бироз вақт ўтгач, учувчисиз аппарат билан боғлиқ ҳодисани Фавқулодда вазиятларга чора кўриш хизмати ҳам тасдиқлаган. Уларнинг баёнотига кўра, дрон тураржой биносига қулаган, зарба оқибатида портлаш юз берган ва уйнинг 10-қаватидаги хонадонда ёнғин келиб чиққан.

“Ҳодиса оқибатларини бартараф этиш ва ҳудуд хавфсизлигини таъминлаш учун воқеа жойига Галац шаҳар куч ва воситалари, Ички ишлар вазирлигининг бошқа бўлинмалари ҳамда Руминия Разведка хизматининг (SRI) ихтисослашган гуруҳлари етиб борди. Ёнғин чиққан хонадон ичида бўлган икки киши мустақил равишда эвакуация бўлишга улгурган. Ҳозирги соатгача қурбонлар аниқланмаган”, дейилади расмий хабарда.

Кейинчалик баёнот янгиланган. Янги маълумотларга кўра, енгил шикастланган (тилинган, шилинган жойлари бор) икки кишига воқеа жойида тиббий ёрдам кўрсатилган. Шунингдек, қутқарувчилар ёнғинни бутунлай ўчирган.

Айни пайтда воқеа жойига портлашлар бўйича ихтисослашган тергов гуруҳи йўл олган. Унинг таркибига Руминия Полиция бош инспекцияси ҳузуридаги Жиноий қидирув бошқармаси ва Миллий криминалистика институти ходимлари киритилган.

Эслатиб ўтамиз, аввалроқ Литва Президенти Гитанас Науседа ва Бош вазир Инга Ругинeне Хавсизлик хизматининг дрон ҳужумлар ҳақидаги огоҳлантириш сигналидан сўнг ҳукумат аъзолари билан махсус бункерга яширинганди. Ўша куни Эстония ҳам ўз ҳудудига учиб келаётган Россиянинг Украинага йўналтирган дронини уриб туширган. Хавфсизлик хизмати мутахассисларининг айтишича, тревогага сабаб бўлган учоқ Украинанинг Россия томонга йўллаган “изидан чиқиб кетган” дрони бўлиши мумкин.