Россия Кривой Рогга баллистик ракета билан ҳужум қилди

Бугун, 12 август куни Россия қўшинлари Украинанинг Днепропетровск вилоятидаги Кривой Рог шаҳрига баллистик ракета билан ҳужум қилди. Бу ҳақда Днепропетровск раҳбари Сергей Лисак маълум қилди.

“Кривой Рогга ракета ҳужуми. Дастлабки маълумотларга кўра, баллистика. Асосийси, қурбонлар йўқ. Ҳозир барча тафсилотлар аниқланмоқда”, деб ёзган Лисак ўзининг Telegram'даги каналида.

Кривой Рог мудофаа кенгаши раҳбари Александр Вилкул эса шаҳарда портлаш бўлганини тасдиқлаб, маҳаллий аҳолини фотосурат ва видеога олмасликка, кадрларни ижтимоий тармоқларга жойламасликка чақирган. Шунга қарамасдан, айни пайтда портлаш содир бўлган жойлардаги тутун булутлари суратлари аллақачон Украина ОАВ томонидан эълон қилинмоқда.

Ҳозирда мамлакатнинг етти вилоятида, жумладан Днепропетровск вилоятида ҳаво огоҳлантириши эълон қилинган.

Эслатиб ўтамиз, жорий йилнинг 2 августга ўтар кечаси Киевга, 8 августда Покровскка, 9 августда Запорожье шаҳрига ҳаво ҳужуми уюштирилганди. Кеча, 11 август куни эса Россия Украинага “Кинжал” ракеталари билан ҳужум қилди.