Путинга кескин мурожаат йўллаган Боня Шавкат Мирзиёевга раҳмат айтди (видео)

Блогер ва телебошловчи Виктория Боня Ўзбекистонга ташриф буюрди ва пахта даласидан туриб мамлакат Президенти Шавкат Мирзиёевга миннатдорлик билдирди. У бу ҳақдаги видеони жорий йилнинг 25 июнь куни ўзининг Instagram саҳифасида эълон қилди.

“Ўзбекистон Президенти Шавкат Миромоновичга миннатдорлик билдирмоқчиман. Мен ҳозир Ўзбекистонда, сизнинг ерларингизда, яъни пахта далаларида турибман. Мен бу ерга маълум бир миссия билан келдим. Бу ерда бўлган бир неча кун ичида мен сизнинг нафақат маданиятингизни сақлаб қолганингизни, балки ерларингизнинг имкониятларини ҳам кўпайтираётганингизни кўрдим. Ва мен учун, буларнинг барчасини қадрлайдиган, табиатни қадрлайдиган инсон сифатида, буни кўриш жуда ёқимли. Биласизми, мен жуда кўп саёҳат қилганман, жуда кўп жойларда бўлганман ва кўряпманки, кўплаб Европа мамлакатлари ҳам тезкор ишлаб чиқаришга ўтмоқда, Хитой арзонроқ, синтетикроқ нарсаларга ўтмоқда ва бу, афсуски, экологиямизни жуда қаттиқ ўлдирмоқда”, дейди Боня.

Шунингдек, у мамлакат халқига узоқ йиллар давомида муваффақиятли бўлишни тилаган.

“Мен ўз кўзларим билан сизнинг қандай ривожланаётганингизни кўришдан жуда хурсандман. Сизга, халқингизга, ерларингизга узоқ юзлаб йиллар давомида муваффақиятли бўлишингизни, ривожланишингизни, одамларга бу маданиятни, қадриятни ва гўзалликни беришингизни чин қалбимдан тилайман. Бунинг учун сизга чин юракдан раҳмат айтаман, чунки мен кўраётган нарса нафақат ажойиб ва меҳрибон одамлар, балки бу жуда-жуда яхши парваришланган ва чиройли жойлар ҳамда ерлар. Раҳмат айтмасликнинг иложи йўқ. Буни қадрламасликнинг иложи йўқ. Шунинг учун, чин қалбимдан халқингизга ривожланишга ва ўсишга имкон берганингиз учун сизга раҳмат айтаман”, дейди блогер.

Эслатиб ўтамиз, жорий йилнинг апрель ойида Виктория Боня жамоатчилик эътиборига тушган эди. Ўшанда у Россия Президенти Владимир Путинга кескин мурожаат билан чиқиб, турли хил муаммоларни тилга олганди. Хусусан, Боня Россия халқи Путиндан қўрқишини айтганди ва Доғистонда юз берган сув тошқинлари, шунингдек, баъзи экологик муаммоларга тўхталган эди.

Шунингдек, у бир неча кун Андижон вилояти ҳокими Шуҳрат Абдураҳмонов билан бирга тушган суратини эълон қилиб, яна бир бор ўзбекистонликлар эътиборига тушди.