Путин Аляскада ёнилғига нақд пулда 85 минг доллар тўлади

Аввалроқ, Россия Президенти Владимир Путин Аляскага боргани ва АҚШ Президенти Дональд Трамп билан музокаралар ўтказгани хабар қилинган эди. Маълум бўлишича, санкциялар сабабли Россия делегацияси самолётлар учун ёнилғини нақд пулда сотиб олишга мажбур бўлган. Бу ҳақда АҚШ Давлат котиби Марко Рубио NBC телеканалига берган интервьюсида сўз очди.

Унга кўра, бу ҳолат Россиянинг санкциялар оқибатида халқаро банк тизимидан фойдалана олмаётганидан далолат беради. Рубио Трампнинг Путин ўт очишни тўхтатишни рад этганига қарамай, нега дарҳол янги санкциялар жорий қилмаганига ҳам изоҳ берган.

“Аввалги барча санкциялар кучида қолмоқда ва улар ўз таъсирини кўрсатмоқда. Масалан, россияликлар Аляскага қўнганда ёнилғини фақат нақд пулга олишга мажбур бўлишди. Улар ҳар куни бундай оқибатларга дуч келишмоқда”, дейди Рубио.

Маълумотларга кўра, Россия авиайўловлар отрядига тегишли Президент самолёти 152 минг 620 литр ёнилғи сиғимига эга. Халқаро ҳаво транспорти ассоциациясининг “Jet Fuel Price Monitor” портали маълумотига кўра, сўнгги пайтларда авиаёнилғи нархи бир галлон (тахминан 3,8 литр) учун 2,10 долларни ташкил қилган. Шунга кўра, бир самолётни ёнилғи билан тўлдириш учун Россия томони, эҳтимол, тахминан 85 минг доллар нақд пул тўлаган.

Унинг айтишича, янги санкциялар жорий этилиши тинчлик музокараларининг муваффақиятсиз тугаганидан дарак беради.

“Бундай вақт келиши мумкин. Аммо у келганда, бу тинчликка имкон қолмаганини англатади. Урушни тугатишнинг ягона йўли – Россия билан келишувга эришиш”, дейди АҚШ Давлат котиби.

Рубионинг сўзларига кўра, музокараларда ҳар икки томон ҳам бирор нарсадан воз кечиши керак бўлади. Шу билан бирга, АҚШ Украинадан Россия назоратига олинмаган ҳудудлардан воз кечишни талаб қилмайди. 

Рубио, шунингдек, Россия тинчлик музокараларида Украина – суверен давлат эканини ва у ўзини ҳимоя қилиш учун ҳарбий иттифоқларга қўшилиш ҳуқуқига эга эканини тан олишига тўғри келишини қайд этган.

Эслатиб ўтамиз, аввалроқ Украина Президенти Владимир Зеленский Оқ уйда Трамп билан учрашув арафасида Украина Донецк вилоятининг Россия эгалламаган қисмларидан воз кечмаслигини айтганди.