Putin Eronga AQSH bilan urushni to‘xtatishga yordam bermoqchi

Rossiya Prezidenti Vladimir Putin kecha, 8 oktyabr kuni Eron Prezidenti Mas’ud Pezeshkiyon bilan ikki tomonlama muzokaralar o‘tkazdi. Uchrashuv Turkmanistonda, Kaspiy dengizi sohilidagi “Avaza” kurort shahrida MDH mintaqaviy sammiti arafasida bo‘lib o‘tdi. Suhbat davomida Rossiya yetakchisi Yaqin Sharqdagi nizoni bartaraf etishga ko‘maklashishga tayyorligini bildirdi.

Vladimir Putin Rossiya va Eron o‘rtasidagi munosabatlarda ijobiy dinamika mavjudligini ta’kidlab, Tehron 2026 yil 28 fevralda AQSH va Isroil tomonidan boshlangan harbiy harakatlarni to‘xtatish uchun amaliy qadamlar qo‘ygani haqidagi bayonot bilan o‘z pozitsiyasini mustahkamlagan.

Mas’ud Pezeshkiyon Vashington bilan to‘g‘ridan to‘g‘ri muzokaralar berk ko‘chaga kirib qolgan dialog fonida o‘z ma’nosini yo‘qotganini ta’kidlagan.

Rossiya OAV xabariga ko‘ra, Pezeshkiyon Putinga “mintaqadagi va BMT darajasidagi pozitsiyasi uchun” minnatdorlik bildirgan. 

“Sizning yordamingiz sababli ular bizga bir tomonlama yondashuvni singdira olishmadi. Buning uchun, sizning pozitsiyangiz va mamlakatingizning pozitsiyasi uchun sizdan hamisha minnatdormiz. Biz ko‘p tomonlamalik sari harakat qilishimiz kerak va bir tomonlamalikning butun dunyo bo‘ylab kengayishiga imkon bermasligimiz lozim. AQSH butun dunyodagi siyosatchilarga o‘z nuqtai nazarini singdirishga harakat qilmoqda. Hozirda aynan o‘sha siyosatchilar boshqalarga o‘z ichki siyosiy kursini majburlab o‘tkazmoqda, boshqa mamlakatlarga bosim qilmoqda”, deydi u.

Eron Prezidenti, shuningdek, AQSH bilan muzokaralar jarayoni atrofidagi mavzuga to‘xtalib, muzokaralar paytida AQSH tomonidan uyushtirilgan hujumlarni eslatib o‘tgan. 

“Biroq biz hech qachon muzokaralar stolini tark etganimiz yo‘q. Biz urushga imkon qadar tezroq chek qo‘yishga harakat qilyapmiz. Hamma bizning huquqlarimizni hurmat qilishi zarur. Biroq, agar ular bir tomonlama yondashuvdan kelib chiqadigan bo‘lsa, bu yaqin orada sodir bo‘la olmaydi”, deydi u.

Putin Pezeshkiyon bilan uchrashuvda ikki tomonlama munosabatlar haqida gapirar ekan, “ular o‘tgan yilning boshida imzolangan fundamental shartnoma asosida ijobiy ruhda rivojlanayotganini” ta’kidlagan.

Rossiya Prezidenti Pezeshkiyondan Eron oliy rahbariga “eng ezgu tilaklarni yetkazishni, farovonlik va eng yaxshi niyatlarni tilashni” so‘ragan.

“Umuman olganda, munosabatlarimiz mustahkamlanmoqda”, deydi u.

Putin Rossiya Eron atrofidagi vaziyatni tartibga solishga yordam berish uchun barcha imkoniyatlarni ishga solishga tayyorligini aytgan. U mintaqadagi bugungi vaziyatni “eng og‘ir muammo” deb atagan. 

Eslatib o‘tamiz, Putin va Pezeshkiyon oxirgi marta 1 sentyabr kuni Qirg‘izistonning Bishkek shahrida bo‘lib o‘tgan Shanxay hamkorlik tashkiloti sammiti doirasida yuzma-yuz uchrashgan edi. O‘shanda ular ikki tomonlama munosabatlar hamda AQSH va Eron o‘rtasidagi nizoni muhokama qilgan.