Путин Эронга АҚШ билан урушни тўхтатишга ёрдам бермоқчи

Россия Президенти Владимир Путин кеча, 8 октябрь куни Эрон Президенти Масъуд Пезешкиён билан икки томонлама музокаралар ўтказди. Учрашув Туркманистонда, Каспий денгизи соҳилидаги “Аваза” курорт шаҳрида МДҲ минтақавий саммити арафасида бўлиб ўтди. Суҳбат давомида Россия етакчиси Яқин Шарқдаги низони бартараф этишга кўмаклашишга тайёрлигини билдирди.

Владимир Путин Россия ва Эрон ўртасидаги муносабатларда ижобий динамика мавжудлигини таъкидлаб, Теҳрон 2026 йил 28 февралда АҚШ ва Исроил томонидан бошланган ҳарбий ҳаракатларни тўхтатиш учун амалий қадамлар қўйгани ҳақидаги баёнот билан ўз позициясини мустаҳкамлаган.

Масъуд Пезешкиён Вашингтон билан тўғридан тўғри музокаралар берк кўчага кириб қолган диалог фонида ўз маъносини йўқотганини таъкидлаган.

Россия ОАВ хабарига кўра, Пезешкиён Путинга “минтақадаги ва БМТ даражасидаги позицияси учун” миннатдорлик билдирган. 

“Сизнинг ёрдамингиз сабабли улар бизга бир томонлама ёндашувни сингдира олишмади. Бунинг учун, сизнинг позициянгиз ва мамлакатингизнинг позицияси учун сиздан ҳамиша миннатдормиз. Биз кўп томонламалик сари ҳаракат қилишимиз керак ва бир томонламаликнинг бутун дунё бўйлаб кенгайишига имкон бермаслигимиз лозим. АҚШ бутун дунёдаги сиёсатчиларга ўз нуқтаи назарини сингдиришга ҳаракат қилмоқда. Ҳозирда айнан ўша сиёсатчилар бошқаларга ўз ички сиёсий курсини мажбурлаб ўтказмоқда, бошқа мамлакатларга босим қилмоқда”, дейди у.

Эрон Президенти, шунингдек, АҚШ билан музокаралар жараёни атрофидаги мавзуга тўхталиб, музокаралар пайтида АҚШ томонидан уюштирилган ҳужумларни эслатиб ўтган. 

“Бироқ биз ҳеч қачон музокаралар столини тарк этганимиз йўқ. Биз урушга имкон қадар тезроқ чек қўйишга ҳаракат қиляпмиз. Ҳамма бизнинг ҳуқуқларимизни ҳурмат қилиши зарур. Бироқ, агар улар бир томонлама ёндашувдан келиб чиқадиган бўлса, бу яқин орада содир бўла олмайди”, дейди у.

Путин Пезешкиён билан учрашувда икки томонлама муносабатлар ҳақида гапирар экан, “улар ўтган йилнинг бошида имзоланган фундаментал шартнома асосида ижобий руҳда ривожланаётганини” таъкидлаган.

Россия Президенти Пезешкиёндан Эрон олий раҳбарига “энг эзгу тилакларни етказишни, фаровонлик ва энг яхши ниятларни тилашни” сўраган.

“Умуман олганда, муносабатларимиз мустаҳкамланмоқда”, дейди у.

Путин Россия Эрон атрофидаги вазиятни тартибга солишга ёрдам бериш учун барча имкониятларни ишга солишга тайёрлигини айтган. У минтақадаги бугунги вазиятни “энг оғир муаммо” деб атаган. 

Эслатиб ўтамиз, Путин ва Пезешкиён охирги марта 1 сентябрь куни Қирғизистоннинг Бишкек шаҳрида бўлиб ўтган Шанхай ҳамкорлик ташкилоти саммити доирасида юзма-юз учрашган эди. Ўшанда улар икки томонлама муносабатлар ҳамда АҚШ ва Эрон ўртасидаги низони муҳокама қилган.