Пауло Фонсека 9 ойга футболдан четлатилди

“Лион” клуби бош мураббийи Пауло Фонсека Лига 1 24-тури доирасида “Брест”га қарши ўйиндаги ҳаракатлари сабаб 2025 йилнинг 30 ноябригача дисквалификация қилинди. Бу ҳақда Франция футбол федерацияси матбуот хизмати хабар берди.

Манбага кўра, ушбу ўйиннинг охирги дақиқаларида ҳакам Бенуа Мильо “Лион” дарвозасига эҳтимолий пенальти белгилаш учун VAR'да такрорий лавҳани кўришга йўл олди. Бу ҳолат португалиялик мураббийга ёқмади ва Паулу ҳакамга бақира бошлади. Рефери мутахассисга қизил карточка кўрсатиш учун унинг олдига келганида ҳам Фонсека тинчлангани йўқ. Оқибатда, мураббий ва ҳакам тўқнашиб кетишига сал қолди. Кейинроқ Фонсека бу ҳаракатлари учун узр сўради. Бироқ Паулу 9 ойга дисквалификация қилинди. Мураббий 15 сентябрга қадар жамоанинг кийиниш хонасига ҳам киритилмайди.

Маълумот ўрнида, португалиялик мутахассис 2025 йилнинг 31 январида “Лион” клуби бош мураббийига айланган эди. “Лион” айни дамга келиб, Франция чемпионати турнир жадвалида 24 турдан сўнг 39 очко жамғарган ҳолда 6-ўринни банд этиб келмоқда.