Отамнинг йўлидан кетмоқчи эдим – “Бахти Ташкентский”нинг ўғли (видео)

Ўзбекистондаги жиноят оламида “Бахти Ташкентский” лақаби билан танилган Бахтиёр Қудратуллаевнинг ўғли, 11 йилга озодликдан маҳрум этилган Бекзод Зафаров отасининг йўлидан кетмоқчи бўлганини, бироқ бу йўл хатолигини тушунганини айтди. Бу ҳақда у Ички ишлар вазирлигининг “Сўнгги пушаймон” лойиҳасига берган интервьюсида гапирди.

“Бахти Ташкентский деб танилган Қудратуллаев Бахтиёр Зафаровичнинг ўғиллари бўламан. Мен ҳам шу отамнинг йўналишларини ушлайман деган хаёлда юрган эдим. Ўйлаганларимнинг ҳаммаси катта хато экан. Хўжалик ишларига, қурилиш ишларига қарашиб тураман. Қолган пайт ишлаб чиқариш корхонасига ишга чиқаман. У ёқда пайвандчилик, темир-терсак билан иш қиламиз. Бир йил олдинги ҳаётим билан ҳозирги ҳаётим анча фарқли”, дейди у.

Шуннингдек, Бекзод жиноят оламидаги таниқли шахсларга эргашишдан ҳеч қандай фойда йўқлигини айтган.

“Бу ерда Бекзодмисан, Бекмисан, ким бўлсанг ҳам ҳамма учун қонун бир. Жиноят оламининг таниқли шахсларига, жиноят оламига қанот бўлиб эргашишдан ҳеч қанақа фойда йўқ. Эл-юртда ота-оналарини хизматида бўлса, маҳаллага, шу жамиятга фойдаси тегадиган инсон бўлса, шу нарсани тушуниб етдим. Ҳамма бошига тушиб нимани йўқотганини тушунаркан. 2 фарзандим бор. Кейинги йил катта ўғлим мактабга чиқади. Тезроқ келинг, сизни соғиндим, деди. Шу гаплар ҳали ҳам хаёлимдан кетмайди. Тунлари кўзларимни ёпганимда болаларим тушимга кириб чиқади. Ўзим шу мактабга чиқаётган пайтларни эслаб ҳозирги кунда ўғлимни 1-синфга – “Биринчи қўнғироқ”қа олиб чиқа олмаслигимдан пушаймонман. Ота-оналар мажлиси бўлади ва ота-оналар мажлисида иштирок эта олмаётганим, унга дарсларида қарашмаётганим, уларга бир яхши ўрнак бўлиб, олдида суянадиган тоғ бўлиб турмаётганларим алам қилади.

Шу нарсалардан афсусланаман. Қизимнинг тили чиқиб, ҳар хил нарсалари пайдо бўлаётган пайт шу нарсани кўролмаяпман. Шу нарсани ўтказиб юбораман. Ҳозир кимнидир айблашим хато. Ўзимда айб. Нотўғри ишлар қилган эканман. Битта касб, битта яхши ҳунар ўрганиб, эл-юртга фойдаси тегадиган иш қилиш керак. Оиламнинг бағрида бўлганимда эди. Ҳозир шунча йўл босиб мени кўргани келяптилар. Қанийди вақтни орқага қайтариш иложи бўлганда, ҳалол меҳнат қилиб, оила бағрида бўлишни жуда истардим. Ҳамма нарсага жазо муқаррар экан. Қонунни билиб, шунга амал қилиб яшаш керак”, дейди у.

Бекзоднинг айтишича, ҳибсхонада тилла идишда ош егандан кўра оила билан кўчада бир бурда нон еган афзал.

“Ҳибсхонада мана 2 йилдан ошиқ ўтирибман. Шуни тушуниб етдимки, ҳибсхонада ош еб, идишинг тилладан бўлганидан кўра, кўчада оила даврасида бир бурда нон еб юрганимиз минг марта афзал экан.

Бу кўчадан, ташқаридан чиройли кўринади, лекин ичига кирганингиздан кейин афсус, кеч бўлар экан. Шунинг учун минг пушаймонман. Ота-онамдан, қариндошларимдан, маҳалламдан, оиламдан, муҳтарам Президентимиздан, раҳбариятдан, ҳаммадан узр сўрайман. Қилган ишимдан чин кўнгилдан пушаймонман. Ёшларга ҳозирги кунда берадиган маслаҳатим – келажакда тўғри юрса, пойдевор бизларга. Уларга маслаҳатим иложи борича ота-онанинг дуосини олиб, эл-юртнинг маҳалла-кўйнинг хизматида бўлиб, яхши касб-ҳунарларнинг эгаси бўлиб, тиллар ўрганиб, ҳар хил давлатлар билан, ташкилотлар билан ҳамроҳликда бирлашиб, Ўзбекистон байроғини кўтариб, ҳаммага танитиб, спорт билан шуғуллансин, хомхаёллар қилмасдан. Ҳамма нарсани қадрласин”, дейди у.

Эслатиб ўтамиз, 2024 йилнинг июль ойида жиноят ишлари бўйича Юнусобод туман судида “Бахти Ташкентский”га оид иш бўйича суд ҳукми эълон қилинганди. Суд ҳукмига кўра, Бекзод Зафаров 11 йил муддатга озодликдан маҳрум этилган. Жазони умумий колонияда ўташ белгиланган. “Бахти Ташкентский”нинг кичик ўғли Ихтиёр Қудратуллаев эса 9 йил муддатга озодликдан маҳрум этилган. Жазони умумий колонияда ўташ белгиланган. Қудратуллаевнинг тўнғич ўғли Бекзод Зафаров Ўзбекистон Республикаси Жиноят кодексининг 165-моддаси (товламачилик) 3-қисми “в” банди, 168-моддаси (фирибгарлик) 4-қисми “в” банди билан айбланиб қўлга олинган. Давлат айбловчиси суддан Бекзод Қудратуллаевни 11 йил муддатга озодликдан маҳрум қилишни сўраган.

Олдинроқ эса суд Бахтиёр Қудратуллаевни 20 йил муддатга озодликдан маҳрум қилиш, унинг акаси Шуҳрат Қудратуллаевни 10 йил-у 6 ой муддатга озодликдан маҳрум қилиш, мазкур иш доирасида судланганлар орасидаги ягона аёл судланувчи Наргиза Жуманиёзовани эса 4 йил-у 4 ой муддатга озодликни чеклаш жазосига ҳукм қилгани хабар қилинганди.