Масс-медиа фонди журналист ва оператор калтакланишини қоралаб чиқди

Аввалроқ Zo'rTV мухбири ва оператори калтаклангани ҳақида хабар бергандик. Ҳолат юзасидан Миллий масс-медиани қўллаб-қувватлаш ва ривожлантириш жамоат фонди муносабат билдирди. 

“Миллий масс-медиани қўллаб-қувватлаш ва ривожлантириш жамоат фонди Zo'rTV журналистларига нисбатан содир этилган зўравонликни қоралайди. Оммавий ахборот воситалари ходимларига ҳар қандай тазйиқ ва уларнинг журналистик фаолиятига тўсқинлик қилишга йўл қўйиб бўлмайди”, дейилади хабарда.

Фонд ваколатли идораларни ушбу ҳодисани атрофлича ўрганиб, айбдорларни қонун доирасида жазолашга чақирган. 

“Жамият манфаати йўлида ўз вазифасини дадил ва ҳалол бажараётган барча журналистларни қатъий қўллаб-қувватлашимизни билдирамиз”, дейилади муносабатда.

Эслатиб ўтамиз, телеканал журналисти ва оператори жорий йилнинг 12 август куни аэропорт яқинида қурилаётган йўл ўтказгичнинг бешта тўсини қулаб тушиши сабабларини ўрганишга борган. Жараён давомида унга корхона иш бошқарувчиси Н.Э. кескин қаршилик кўрсатиб, телеканал ходимларини жароҳатлаган ҳамда техник буюмларга шикаст етказган.

Кейинчалик Н.Э. Меҳнат кодексининг тегишли моддалари билан ишдан олинди. Шунингдек, ҳолат юзасидан жиноят иши қўзғатилди. 

Ушбу воқеадан сўнг Ахборот ва оммавий коммуникациялар агентлиги ҳам муносабат билдирганди.