Qashqadaryoda o‘gay ona 3 yashar qizini urib o‘ldirdi

Qashqadaryo viloyatining Kasbi tumanida ona 3 yashar o‘gay qizini urib o‘ldirdi. Bu haqda Bolalar ombudsmani xabar berdi.

Qayd etilishicha, joriy yilning 26 sentyabr kuni Qashqadaryo viloyatining Kasbi tumanida yashovchi fuqaro I.S. (1994 yilda tug‘ilgan ayol) turmush o‘rtog‘i N.A (1988 yilda tug‘ilgan erkak) bilan o‘zaro nizolashishib, uning voyaga yetmagan farzandi O.Sh (2022 yilda tug‘ilgan qiz bola)ni urgan. Oqibatda bola bosh qismidan jiddiy jarohatlangan va sog‘ligi keskin yomonlashib, shu kunning o‘zida u vafot etgan.

Mazkur holat yuzasidan 27 sentyabr kuni tuman IIB Tergov bo‘limi tomonidan Jinoyat kodeksining 126-moddasi (oilaviy zo‘ravonlik), 8-qismi, “g” bandi (jabrlanuvchining o‘limiga sabab bo‘lsa) bilan jinoyat ishi qo‘zg‘atilgan. I.S Jinoyat-protsessual kodeksining 221-moddasiga asosan gumonlanuvchi tariqasida ushlangan. Keyinroq bolaning o‘limiga olib kelgan mazkur jinoyat hodisasi yuzasidan jinoyat ishi joriy yilning 30 sentyabr kuni Qashqadaryo viloyat prokuraturasi yurituviga olinib, Jinoyat kodeksining 97-moddasi (qasddan odam o‘ldirish) bilan qayta malakalangan. Dastlabki tergovni viloyat prokuraturasi olib bormoqda.

Bildirilishicha, Bolalar ombudsmani bolaga qarshi sodir etilgan mazkur jinoyat ishi yurituvi ustidan o‘z kuzatuvini davom ettiradi. Holat yuzasidan qo‘shimcha tarzda axborot taqdim etiladi.

Eslatib o‘tamiz, kecha, 2 oktabr kuni Senat tomonidan ma’qullangan  Bolalarni zo‘ravonlikdan himoya qilish tizimini takomillashtirishga oid qonunga ko‘ra, bolaning o‘limiga sabab bo‘lgan qasddan jinoyatlar uchun shartli hukm qilish va muddatidan ilgari shartli ozod qilishga yo‘l qo‘yilmaydi.