Humans асосчиси ҳам халқаро қидирувга берилди

Humans Group бош директори ва асосчиси Владимир Добринин ҳам халқаро қидирувга берилди. Бу ҳақдаги эълон Интерпол сайтида пайдо бўлди.

Эълонга кўра, Ўзбекистон Добрининга нисбатан “қизил билдиришнома” (Red Notice) расмийлаштирган. Унга қимор ва таваккалчиликка асосланган бошқа ўйинларни ташкил этиш ва ўтказиш, шунингдек, жиноий фаолиятдан олинган даромадларни легаллаштириш (пул ювиш) бўйича айблов эълон қилинган. Шунингдек, эълонда айбловларнинг таърифи сўров юборган томон тақдим этган шаклда эълон қилингани келтирилган.

Маълумот учун, Ўзбекистон Республикаси Жиноят кодексининг 278-моддасига кўра, қимор ва таваккалчиликка асосланган бошқа ўйинларни ташкил этиш ва ўтказиш 7 йилгача озодликдан маҳрум қилиш билан жазоланади. Мазкур ҳаракатлар уюшган гуруҳ томонидан ёки унинг манфаатларини кўзлаб содир этилган бўлса, 7 йилдан 10 йилгача озодликдан маҳрум қилиниши мумкин. Шунингдек, жиноий фаолиятдан олинган даромадларни легаллаштириш (243-модда) 5 йилдан 10 йилгача озодликдан маҳрум қилишни назарда тутади.

Humans иши 

2025 йилнинг июнь ойида Ўзбекистонда фаолият юритувчи Humans компаниясининг Сингапурдаги таъсисчиси – Humans Mobile Ltd Ўзбекистон Марказий банки ва “Ўзбектелеком” хатти-ҳаракатлари ортидан халқаро арбитражга шикоят киритганди. Даъво аризасини беришга Ўзбекистон ва Сингапур ҳукуматлари ўртасида 2003 йил 15 июлда имзоланган ва 2003 йил 23 ноябрдан кучга кирган Инвестицияларни рағбатлантириш ва ҳимоя қилиш тўғрисидаги икки томонлама битим қоидаларининг бузилиши асос қилиб кўрсатилган.

Кейинроқ эса Humans виртуал оператори “Ўзбектелеком” АК мобил тармоғидан фойдаланиб, даромад топса-да, унинг харажатларини тўлашни ортга суриб келгани маълум бўлди. “Ўзбектелеком”нинг билдиришича, Humans виртуал оператори, бошқа мобил операторлардан фарқли равишда, ўз тармоғини яратиш учун сармоя киритмаган. Шунинг учун, у мобил алоқа хизматларини кўрсатишга 2020 йилдан буён шартнома асосида “Ўзбектелеком” АК мобил тармоғидан фойдаланиб келган.

2025 йилнинг декабрида Humans иловасига уланган карталардан оммавий пул ечиб олинди. Бунинг ортидан эса Тошкент туманлараро иқтисодий суди Octobank аризасига биноан Humans компаниясини банкрот деб топгани ва унинг фаолиятини тўхтатмаган ҳолда тугатиш жараёнини бошлагани аён бўлди.

Эслатиб ўтамиз, аввалроқ 2024 йил октябрдан 2025 йил августгача “Ўзбекистон металлургия комбинати” АЖга раҳбари лавозимида ишлаган Дилшод Аҳмедов ва “Равшан золотой” лақаби билан танилган ўзбекистонлик Равшан Муҳитдинов Ўзбекистон Республикаси Ички ишлар вазирлиги сўрови билан Интерпол орқали халқаро қидирувга берилгани маълум бўлган эди.