G7 давлатлари Россияга қарши трибунал ташкил қилмоқчи

G7 давлатлари Адлия вазирлари жорий йилнинг июль ойида Токиода бўлиб ўтадиган йиғилишда Украина атрофидаги вазият туфайли Россия Федерациясига қарши махсус трибунал ташкил этиш масаласини муҳокама қилиши мумкин. Бу ҳақда Европа комиссари Диде Рейндерсга таяниб, “Kyodo” ахборот агентлиги хабар берди. 

Диде Рейндерс бу йил G7'га раислик қилаётган Япония ўз мақомидан Осиёнинг бошқа давлатларига реал таъсир кўрсатиш учун фойдаланиши ва халқаро ҳамжамиятнинг қўллаб-қувватлашини қозониш учун трибунал ташкил этишига умид билдирган.

Унинг сўзларига кўра, ҳозирда ЕИ Украина суд тизими ва Халқаро жиноий суд (ХЖК) билан турли мамлакатлар, жумладан, Украина судьялари иштирокида “махсус суд” ёки “гибрид суд” ташкил этиш масаласини кўриб чиқиш устида ишламоқда.

Маълумот учун, Япония раислик қилаётган G7 давлатлари раҳбарлари жорий йилнинг май ойида Япониянинг Хиросима шаҳридаги саммитга тўпланади. Саммитда АҚШ, Буюк Британия, Франция, Германия, Италия, Япония, Канада, Италиядан ташқари G7'га кирмайдиган Ҳиндистон, Жанубий Корея ва Украина етакчилари ҳам қатнашади.

Эслатиб ўтамиз, жорий йилнинг 17 март куни ХЖС Россия Президенти Владимир Путин ва Президентнинг болалар ҳуқуқлари бўйича комиссари Мария Львова-Беловани украиналик болаларни ноқонуний депортация қилишда айблаб, ҳибсга олишга ордер берган эди. Путиннинг матбуот котиби Дмитрий Песков эса Москва ХЖСнинг юрисдикциясини тан олмаслигини айтганди. Ўз навбатида, Россия ТИВ расмий вакили Мария Захарова Гаагадан олинган маълумотларга тўхталар экан, ХЖС қарорлари Россия учун ҳеч қандай маънога эга эмаслигини ва ҳибсга олиш ҳақидаги мумкин бўлган ордерлар қонуний кучга эга эмаслигини таъкидлаган эди. ХЖС қароридан сўнг Германия Путинни ҳибсга олишини эълон қилган бўлса, Венгрия бундай қилмаслигини эълон қилган, Арманистон эса Путин мамлакатга келса, у ҳибсга олинишини айтган, кейинчалик эса парламент вице-спикери Акоп Аршакян ҳукмрон партия бундай ниятда эмас эканини маълум қилган эди.