G7 давлатлари Россияга қарши “қаттиқ” санкциялар қўлламоқчи 

“Катта еттилик” (G7) давлатлари Украинадаги воқеалар ва қўшма қаттиқ санкциялар туфайли Россияга нисбатан қатъий ягона позицияни сақлаб қолиш зарурлигини тасдиқлади. Бу ҳақда Япония Бош вазири Фумио Кисида “Катта еттилик” давлатлари етакчилари билан ўтказилган телеконференция якунлари бўйича маълум қилди. 

“Россиянинг Украинага бостириб кириши жаҳон тартиби асосларини силкитганини таъкидладим. Биз халқаро ҳамжамият бирлиги ва тегишли жавоблар зарурлигини қайд этдик”, деган Япония Бош вазири. 

У, шунингдек, томонлар Россияга қарши “қаттиқ қўшма санкциялар зарурлиги” борасида бир фикрда эканини айтган. 

“Атом бомбасига гувоҳ бўлган ягона давлат сифатида мен ядровий қурол таҳдидини қабул қилиб бўлмас деб биламан”, дея қўшимча қилган Кисида. 

Ўз навбатида, Япония Ташқи ишлар вазири Ёсимаса Хаяси “ядро қуролидан фойдаланиш ҳеч қандай шароитда амалга оширилмаслиги кераклиги”ни таъкидлаган.

Россиянинг Украинага босқини

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бунинг ортидан Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирди. Кўп ўтмай Президент Россия билан дипломатик алоқани узди.

Рус қўшинлари дастлаб Киев ва Харьковга ракета ҳужуми уюштирди. Президент Зеленский мамлакатда ҳарбий ҳолат эълон қилди. Шунингдек, расмий идора рус қўшинлари Харьков ва Одесса вилоятига кириб борганини билдирди.

Ҳужум бошланганидан кўп ўтмай, ЛХР Ички ишлар вазири маслаҳатчиси Виталий Киселев Счастье ва Станица шаҳарчалари ЛХР назоратига ўтганини эълон қилди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.