Францияда 20 ёшли регбичи машғулот вақтида вафот этди

Франциянинг “Безье” клуби академиясида тўп сурган жанубий африкалик регбичи Лукобо Макведини машғулот вақтида ҳушидан кетиб, 20 ёшида вафот этди. Бу ҳақда “L’Equipe” нашри хабар берди.

Нашр маълумотларига кўра, кеча, 10 июль куни эрталаб бўлиб ўтган машғулот чоғида спортчи ўзини ёмон ҳис қилган ва ҳушидан кетган. У зудлик билан шифохонага етказилган, бироқ шифокорларнинг саъй-ҳаракатларига қарамай, бир неча соатдан сўнг вафот этган.

“Чуқур қайғу ва оғир юрак билан ёш ўйинчимиз Лукобо (Бибо) Маквединининг фожиали вафоти ҳақида маълум қиламиз”, дейилади “Безье” клуби тарқатган баёнотда.

Макведини 2025 йилда Жанубий Африка Республикасидан Францияга кўчиб ўтиб, “Безье” академиясига қўшилган эди. 11 карра Франция чемпиони бўлган клуб ҳозирда мамлакатнинг иккинчи дивизионида иштирок этмоқда. Бунга қадар у Жанубий Африка ёшлар терма жамоаси сафида ўйнаган.

Спортчи асосий жамоа сафида расмий дебют қилишга улгурмади. Бироқ “L’Equipe” маълумотига кўра, мураббийлар штаби уни жорий мавсумда профессионал жамоа таркибига жалб этишни режалаштирган эди.

Эслатиб ўтамиз, аввалроқ Малайзиянинг Малакка шаҳрида бўлиб ўтган ўртоқлик учрашуви вақтида футболчи Р. Танеш чақмоқ уриши оқибатида вафот этганди.