Францияда 2 йил ичида 5-марта Бош вазир ўзгарди

Франция Президенти Эммануэль Макрон Франция Миллий Ассамблеяси Франсуа Байру ҳукуматига ишончсизлик вотумини қабул қилганидан бир кун ўтиб, мамлакат Мудофаа вазири ва унинг иттифоқчиси Себастьен Лекорнюни Бош вазир этиб тайинлади. Париждаги Елисей саройи кеча, 9 сентябрь куни 39 ёшли сиёсатчига бюджет бўйича консенсусга эришиш учун парламентдаги партиялар билан маслаҳатлашувлар ўтказиш вазифаси юкланган.

Шундан сўнг, Лекорню Президентга янги Вазирлар Маҳкамасини таклиф қилиши керак. Ҳукуматнинг янги раҳбари Миллий Ассамблея томонидан мамлакатнинг 2026 йилги бюджетини тезда тасдиқлаши ва аввалги бош вазир Байрунинг истеъфога чиқишига сабаб бўлган можарони ҳал қилиши керак.

Шу тариқа, сўнгги икки йил ичида бешинчи марта янги Бош вазир тайинлашга мажбур бўлган Макрон ҳукуматни шакллантиришни сўл партияларга топширишдан яна бош тортди. Мухолифат бу қарорни танқид қилди. 2024 йил январда Элизабет Борн бош вазир лавозимидан кетгач, ҳукумат раҳбари бўлган Габриэль Атталь шу йили июль ойида истеъфога чиқди. 2024 йил сентябрь-декабрь ойларида Мишель Барнье Франция бош вазири бўлди. Декабрда Франция Президенти Эммануэль Макрон марказчи “Демократик ҳаракат” (MoDem) партияси етакчиси Франсуа Байруни мамлакат Бош вазири лавозимига тайинлади. Мана энди унинг истеъфосидан кейин яна янги ҳукумат раҳбари тайинланди. 

Хусусан, “яшиллар” етакчиси Марин Тонделье парламент сайловларида фақат иккинчи ўринни эгаллаган ҳукумат лагеридан бошқа бош вазирнинг тайинланишини “провокация” деб атади. 

Бир кун аввал Франция парламентининг қуйи палатаси тўққиз ойлик ваколат муддатидан сўнг бош вазир Байруни истеъфога чиқарди. Миллий ассамблеянинг фавқулодда йиғилишида ҳукуматга ишонч масаласи бўйича овоз беришдан олдин Байру яна бир бор ўзининг 2026 йилга мўлжалланган тежамкорлик режасини қўллаб-қувватлашга уринди, бу эса харажатларни деярли 44 миллиард еврога қисқартиришни назарда тутади.

Шундан сўнг ўта ўнгчи “Миллий бирлик” етакчиси Марин Ле Пен Франция Президентини муддатидан олдин парламент сайловлари ўтказишга чақирди.