“Бизга ҳокимиятни беринг”. Қиличдорўғли юруклардан овоз сўради

Бугун, 22 август куни Мерсиндаги “2-Қардош кўчманчилар — юруклар тадбири”да сўзга чиққан Жумҳурият халқ партиясининг (ЖХП) лидери Камол Қиличдорўғли юруклар (Анадолу тоғларида анъанавий кўчманчи ёки ярим кўчманчи ҳаёт тарзини сақлаб қолган туркман қабилалари) дан овоз сўради. Бу ҳақда “Haberler” хабар берди.

“Туркиянинг қайси бурчагида юрук чодири бўлмасин, у ерга хизмат, таълим хизмати, электр энергияси ва мактаб хизматларини етказиб беришга қасам ичганмиз. Биз буни амалга оширамиз, лекин сизнинг қўллаб-қувватлашингизни сўраймиз. ЖХП учун овоз беришингизни сўраймиз. Бизга ҳокимиятни беринг ва хизматлар қандай кўрсатилишини, маънавий қадриятлар қандай ҳурмат қилинишини кўрасиз – буларнинг барчасини амалга оширамиз”, дейди партия етакчиси.

Асосий мухолифат партия лидери Камол Қиличдорўғли Мерсинда ўтказилган “2-Қардош кўчманчи юруклар фестивали”да иштирок этган. Қиличдорўғлига мамлакат байроғи, кепка, юруклар рўмоли, тасбеҳ ва ушбу минтақада ўсадиган демиржик ёғочидан ўйиб ишланган юруклар ҳассаси совға қилинган.

“Ижозат берсангиз, ўз фикрларимни Қоражоўғлоннинг тўртлиги билан ифода этсам: Тоғлардаги қорлар эрисин, эрисин. Эриб, текисликларни қопласин. Туркман беги ўз яйловига томон йўл олсин. Қўзичоқлар маърасин, биз ҳам йўлга тушайлик. Ҳозир қўзичоқлар маърайдиган ва кўчманчилар яйловга кўтариладиган вақт. Шу сабабли бу ерда бўлишдан, сиз билан бирга бўлишдан, юруклар байрамида иштирок этишдан жуда ҳам бахтиёрман. Алоҳида таъкидлашни истардимки, менинг илдизларим ҳам юрукларга бориб тақалади, мен юруклар маданиятини биламан ва болалигимда ушбу маданият ичида яшаганман.

Биз Асрлар давомида Товр тоғларида яшаб келаётган маданият, турмуш тарзи, солидарлик руҳи ва ушбу замин хотирасини сақлаб қолиш учун йиғилдик. Юрук бўлиш – бу шунчаки кўчманчи ҳаёт кечириш дегани эмас. Юрук – бу озодликдир. Юрук – бу пешона теридир. Юрук – бу ҳамжиҳатликдир. Юрук – қийин шароитларда руҳан тушкунликка тушмаслик, нонни баҳам кўриш, қўшнининг муаммосини ўз муаммоси деб билишдир. Юрукликлар – бу Товрнинг тик сўқмоқларида, яйловларнинг салқинида ва текисликларнинг иссиғида шу кунларгача етказилган буюк меросдир”, дейди Қиличдорўғли. 

Унинг айтишича, бу мерос шунчаки ўтмиш хотираси эмас, балки келажакка олиб ўтадиган улкан қадрият. Бугун қардош кўчманчилар сифатида учрашувнинг маъноси ҳам айнан шунда. 

“Чунки бизни нафақат ранг-баранглигимиз, балки ушбу ранг-барангликни қардошликда сақлаб қолиш қобилиятимиз ҳам кучли қилади. Юрук маданиятининг энг муҳим қадриятларидан бири – бу баҳам кўриш санъатидир. Дастурхон атрофига ўтирганда – нонни бўлишиш. Чодир қурганда – қўшнига жой топиш. Мусибат тушганда – “бу менинг ишим эмас” демаслик. Анадолудаги қардошлигимизнинг асли моҳияти ва хамирмаяси айнан шундадир”, дейди Қиличдорўғли.

ЖХП раисининг айтишича, Товр чодири – бу Туркиянинг умиди. 

“Ҳеч ким унутмасин: Товр чодири – бу Туркиянинг умидидир. Бугунги кунда юрук маданиятини сақлаб қолиш — бу нафақат қўшиқларимиз, рақсларимиз, кийимларимиз ва таомларимизни асраш деганидир. Энг муҳими – юрук меҳнатини ҳимоя қилишдир. Бу чорвачилик билан шуғулланаётган фуқароларимизнинг муаммоларини ҳал қилишни англатади. Бу чорвадорнинг йўли, яйловдаги сув ва электр энергияси ҳақида қайғуришни англатади. Бу ишлаб чиқарувчи ўз меҳнатига муносиб ҳақ олишини таъминлашни англатади. Бу ёшларимизга ўз мамлакатида келажак барпо этиш йўлини очиб беришни англатади. Шаҳар ҳокимимиз маҳаллий бошқарув доирасида юрукларга тегишли барча ташаббусларни шу ерда тақдим этди. Биз нафақат Мерсинда, балки Туркиянинг қайси бурчагида бўлмасин, ҳар бир юрук чодирига хизматларни – таълим, электр энергияси ва мактабларни етказиб беришга қасам ичганмиз. Биз буни амалга оширамиз, лекин сизнинг қўллаб-қувватлашингизни сўраймиз. ЖХП учун овоз беришингизни сўраймиз. Бизга ҳокимиятни беринг ва хизматлар қандай кўрсатилишини, маънавий қадриятлар қандай ҳурмат қилинишини кўрасиз – буларнинг барчасини амалга оширамиз”, дейди у.

Қиличдорўғлига кўра, шу сабабли сиёсатга бўлган ёндашув шунчаки сайловдан сайловгача одамларнинг эшигини қоқиш эмас, балки уларнинг ҳаётига дахлдор бўлган муаммоларни ҳал қилиш. Муаммоларни ҳал қилмайдиган сиёсатнинг ўзи муаммога айланади. 

“Агар юрук қардошларимизнинг чорваси бўлса, сиёсат озуқа нархи ҳақида гапириши шарт, агар улар яйловга кўтарилса, уларнинг транспорти ҳақида, агар маҳсулот ишлаб чиқарса, сотиш бозори ҳақида, агар фарзандлари ўқиётган бўлса, уларнинг таълими ҳақида қайғуриши шарт. Чунки сиёсат инсон ҳаётига дахлдор бўлгандагина маъно касб этади. Сизнинг чодирларингиз – бу Мустақиллик уруши чодирларидир. Сизнинг чодирларингиз – камбағаллар тўйдирилган чодирлардир. Сизнинг чодирларингиз – пешона тери муқаддас саналадиган маконлардир. Сизнинг чодирларингиз – Туркиянинг ҳар бир фуқароси учун фахр-ифтихордир. Сиз буни билишингиз керак. Бу чодир – қаршилик ва саботдир. Бу чодир – кўкка кўтарилаётган тутун ва умиддир. Бу чодир – бир вақтнинг ўзида халқимизнинг мустақилликка бўлган иродасидир. Модомики Товрда юрук чодири бор экан, у ерда ҳамжиҳатлик бор, умид бор, нон бор, меҳнат бор ва қардошлик бор”, дейди сиёсатчи.

Маълумот учун, 2023 йилда Туркияда икки босқичда президентлик сайловлари ўтказилди. Биринчи босқичда ҳеч бир номзод 50 фоиздан ортиқ овоз ололмагани сабабли, 28 май куни иккинчи босқич сайлови бўлиб ўтди. Унда амалдаги Президент Ражаб Тойиб Эрдўған ғалаба қозонди. Эрдўған иккинчи босқичда овозларнинг 52,18 фоизини қўлга киритиб, асосий рақиби, мухолифат етакчиси Камол Қиличдорўғлини ортда қолдирди. Бу билан Эрдўған яна 5 йил муддатга президент лавозимида қоладиган бўлди. Қиличдорўғли эса 47,82 фоиз овоз олди.

Эслатиб ўтамиз, аввалроқ Туркиянинг асосий мухолифатдаги Жумҳурият халқ партиясининг суд қарори билан лавозимидан четлатилган собиқ раиси Ўзғур Ўзел партиядан расман чиқиши ва янги сиёсий партия тузаётганини маълум қилганди.