Эрдўған Қиличдорўғлини судга берди

Туркия Президенти Ражаб Тойиб Эрдўған мамлакатнинг асосий мухолиф партияси – Республика Халқ партиясининг собиқ раиси Камол Қиличдорўғлига қарши судга даъво аризаси киритди. Бу ҳақда  Эрдўғаннинг адвокати Ҳусейин Айдинга таяниб, “Takvim” хабар берди.

Ҳусейин Айдинга кўра, Президент собиқ рақибидан маънавий зарар етказгани учун 500 минг турк лираси (тахминан 14,5 минг АҚШ доллари) миқдорида товон талаб қилган. 2016 йил 15 июль кунги давлат тўнтаришига уринишидан сўнг Эрдўған сиёсий муҳокамаларда ўзаро ҳурмат муҳитини ўрнатиш умидида Қиличдорўғлига қарши илгари киритган барча даъво аризаларини қайтариб олган. Бироқ орадан саккиз йил ўтган бўлса-да, Қиличдорўғли бу масалада ҳеч қандай ижобий ўзгариш кўрсатмаган ва аксинча, унинг хатти-ҳаракатлари ўта қўполлик даражасига етган.

Шундан сўнг адвокат Эрдўғаннинг сиёсий муҳокамаларда ҳурматни таъминлашдаги уринишлари муваффақиятсиз бўлганини қайд этган ва Президентнинг ҳуқуқлари жиддий равишда бузилганини таъкидлаган. Шу сабабли Қиличдорўғли устидан Анқара Бош прокуратурасида жиноий иш очилган. Шунингдек, фуқаролик ишлари бўйича биринчи инстанция судига маънавий зарар учун товон тўлаш талаби билан мурожаат қилинган.

Маълумот учун, 2023 йилда Туркияда икки босқичда президентлик сайловлари ўтказилди. Биринчи босқичда ҳеч бир номзод 50 фоиздан ортиқ овоз ололмагани сабабли, 28 май куни иккинчи босқич сайлови бўлиб ўтди. Унда амалдаги Президент Ражаб Тойиб Эрдўған ғалаба қозонди.

Эрдўған иккинчи босқичда овозларнинг 52,18 фоизини қўлга киритиб, асосий рақиби, мухолифат етакчиси Камол Қиличдорўғлини ортда қолдирди. Бу билан Эрдўған яна 5 йил муддатга президент лавозимида қоладиган бўлди. Қиличдорўғли эса 47,82 фоиз овоз олди. 

Эслатиб ўтамиз, аввалроқ АҚШ президентлигига сайланган Дональд Трамп мамлакатдаги оммавий ахборот воситалари унга қарши чиққанини айтиб, судга “New York Times”, CBS каби нашрлар устидан миллиардлаб доллар миқдорида даъво аризалари киритгани хабар қилинган эди.