Бельгия ва Миср плей-офф йўлланмасини қўлга киритди

Бугун, 27 июнь куни 2026 йилги Жаҳон чемпионати “Г” гуруҳи 3-туридан ўрин олган учрашувлар якунига етди. Унга кўра, Бельгия ва Миср миллий терма жамоалари плей-офф босқичига йўлланма олди.

Бельгия Канаданинг Ванкувер шаҳрида бўлиб ўтган баҳсда Янги Зеландияни 5:1 ҳисобида мағлуб этди ва гуруҳ пешқадами сифатида кейинги босқичга чиқди.

Ғолиблар сафида Леандро Троссард 28- ва 50-дақиқаларда гол уриб, дубль қайд этди. Шунингдек, Кевин де Брюйне 66-дақиқада, Ромелу Лукаку 86-дақиқада ва Алексис Салемакерс 90+4-дақиқада гол урди. Янги Зеландиянинг ягона голига эса 84-дақиқада Элайжа Жаст муаллифлик қилди.

Гуруҳнинг иккинчи учрашувида Миср ва Эрон 1:1 ҳисобида дуранг ўйнади. Ушбу натижа Мисрга 5 очко билан гуруҳда иккинчи ўринни эгаллаб, плей-офф йўлланмасини қўлга киритиш имконини берди.

Эрон эса 3 очко билан учинчи ўринда қолди ва энди плей-оффга чиқиш учун бошқа гуруҳлардаги учинчи ўрин соҳибларининг натижаларига умид боғлайди.

Якуний натижаларга кўра, Бельгия ва Миср бир хил — 5 очкодан жамғарди. Бироқ тўплар нисбати яхшироқ бўлгани учун Бельгия “Г” гуруҳини биринчи ўринда якунлади ва плей-оффга гуруҳ ғолиби сифатида йўл олди.