Инфантино футбол жамоатчилигидан узр сўради

FIFA президенти Жанни Инфантино Жаҳон чемпионати ҳуқуқларини хусусий инвесторга сотиш лойиҳасини режалаштиришда йўл қўйилган хатолар учун узр сўради. Бу ҳақда ташкилот матбуот хизмати хабар берди.

Кеча, 15 октябрь куни Цюрих шаҳрида FIFA Кенгашининг йиғилиши бўлиб ўтган. Унда Инфантино футбол оламини бирдамликка чақириб, “Футбол ҳамма учун ва ҳамма жойда”, дея таъкидлаган.

“FIFA Кенгаши сўнгги ойларда турли манфаатдорлар томонидан танқидга учраган FIFA Forward Enterprise (FFE) лойиҳаси таклифини муҳокама қилди. FIFA президенти лойиҳани ишлаб чиқиш ва уни жамоатчиликка тақдим этиш жараёнида йўл қўйилган хатолар учун узр сўради. Шунингдек, FFE ташаббуси бутунлай бекор қилинганини ва ҳеч қандай шаклда қайта тикланмаслигини тасдиқлади”, дейилади ташкилот баёнотида.

Жорий йилнинг июль ойида Инфантино FIFA’нинг эркаклар ва аёллар ўртасидаги асосий мусобақаларини бошқариш билан шуғулланадиган алоҳида компания ташкил этишни режалаштираётгани маълум бўлган эди. Унинг фикрича, FIFA Forward Enterprise лойиҳаси FIFA’га аъзо ассоциацияларнинг даромадларини ошириш ва бутун дунёда футбол ривожига ҳисса қўшиши мумкин эди.

Халқаро футбол федерацияси ушбу ташаббус орқали 4,2 миллиард доллар маблағ жалб қилиш мумкинлигини билдирган. Бироқ лойиҳа турли расмийлар, футбол федерациялари ва бошқа ташкилотлар томонидан кескин танқидга учради. Кенг жамоатчилик орасида ҳам эътирозларга сабаб бўлган ташаббусдан сўнг Инфантино ушбу ғоядан воз кечди.

Эслатиб ўтамиз, аввалроқ FIFA Нью-Йоркдаги Трамп минорасида жойлашган офисни етти йилдан ортиқ муддатга ижарага олгани ва бу ташкилотга жами қарийб 4 миллион долларни тушгани ҳақида хабар берилганди.