Байденни Украина ва бошқа давлатлар назорат қиляпти – Трамп

АҚШнинг собиқ президенти Дональд Трамп Американинг амалдаги етакчиси Жо Байден Украина ва бошқа бир қатор давлатлар томонидан назорат қилиниши, Оқ уй раҳбари улардан миллионлаб доллар олганини айтди. Бу ҳақда у Truth Social ижтимоий тармоғида ёзди.

"Жо Байден Хитой, Украина ва бошқа бир қанча давлатлар томонидан бутунлай назорат қилинади. Улар у ҳақида, унинг барча хатолари ҳақида ҳамма нарсани билади", деб ёзган Трамп.

Шунингдек, Оқ уйнинг собиқ раҳбари Байденни “мамлакатни дўзахга олиб бораётган” президент деб атаган. Трампнинг сўзларига кўра, Байденлар оиласи хорижий давлатлардан 20 миллион доллардан ортиқ маблағ олган ва ҳозирда АҚШнинг амалдаги Президенти “шантаж” қилинмоқда.

Айтиш жоизки, собиқ президент амалдаги маъмуриятни, жумладан, унинг Украинага миллиардлаб АҚШ доллари жўнатиш қарорини бир неча бор танқид қилган.

Маълумот учун, АҚШда навбатдаги президентлик сайловлари 2024 йил ноябрида бўлиб ўтади. Трамп 2022 йил ноябрида энг юқори давлат лавозими учун курашга қўшилишини эълон қилган. Байден жорий йилнинг апрель ойида қайта сайланиш ниятида эканини маълум қилган.

Эслатиб ўтамиз, олдинроқ АҚШ Конгрессида Байденга импичмент эълон қилиш масаласи кўтарилганди.  Байденнинг оила аъзолари – Хантер, Жеймс ва Халле Байденлар ҳамда уларнинг компаниялари 2015 йилдан 2017 йилгача Хитойнинг State Energy HK Limited компаниясидан 1,3 миллион доллар пул олгани аниқланганди. Шунингдек, Хантер Байден россиялик, қозоғистонлик ҳамда украиналик тадбиркорлардан пул олгани айтилди.