БАА Трампга бир томчи нефть совға қилди

Бугун, 16 май куни АҚШ Президенти Дональд Трампга Бирлашган Араб Амирликлари томонидан бир томчи нефть солинган қути совға қилинди. Бу ҳақда CNN ёзди.

“Бу сайёрадаги энг сифатли нефть. Лекин улар менга фақат бир томчи беришди”, деди Трамп кулиб.

Аммо бу бир томчи каттароқ маънога эга бўлиши мумкин. Дунёнинг энг йирик нефть экспортчиларидан бири бўлган Бирлашган Араб Амирликлари ўз иқтисодиётини углеводородлардан узоқлаштириш бўйича кенг кўламли ҳаракатга киришар экан, ишлаб чиқарилган нефтнинг сўнгги баррелини нишонлашини эълон қилган.

БАА Президенти Шайх Муҳаммад бин Зоид Ол Наҳаён 2015 йилда “50 йилдан кейин биз охирги нефть баррелини нишонлаймиз”, деган.

“Нефть тугайдиган ресурс эди, шунинг учун биз келажакдаги ривожланиш режаларимизни шу асосга асосланиб тузишимиз керак”, дея таъкидлаган БАА етакчиси

Қайд этиш жоиз, нефть давлат даромадларининг қарийб 60% ва ЯИМнинг 30% дан камроғини ташкил қилади, бу эса нефтга бой қўшни Кўрфаз мамлакатларига қараганда анча паст.

Президент Дональд Трамп Вашингтонга жўнаб кетишдан олдин Иброҳимлар оиласи уйини кўздан кечирди. Мажмуада масжид, синагога ва черков жойлашган. Трамп масжид, синагога ва черковни зиёрат қилиб, меҳмонлар китобига имзо чекди ва бу жойдан ҳайратда қолган.

“Буюк бирдамлик, буюк эътиқод, ақл бовар қилмайдиган одамлар, менинг дўстим бўлган буюк раҳбар билан”, деди Трамп Бирлашган Араб Амирликлари халқига йўллаган мурожаатида.

Шундай қилиб, Дональд Трамп Саудия Арабистони, Қатар ва Бирлашган Араб Амирликларида тўхташларни ўз ичига олган Яқин Шарққа сафарини якунлаб, Абу-Дабидан жўнаб кетди.

Трампнинг Яқин Шарққа ташрифи

Яқин Шарққа ташриф буюрган Трамп 13-16 май кунлари мазкур минтақада бўлади. АҚШ Президенти ҳозиргача мазкур ташриф давомида Саудия Арабистони билан АҚШ иқтисодиётига 600 млрд доллар сармоя киритиш бўйича битим имзолади. 

Шунингдек, Трамп ва Қатар ҳукумати ўртасида 1,2 триллион доллардан ортиқ қийматга эга иқтисодий ҳамкорлик тўғрисидаги шартнома имзоланди. Мазкур шартнома Boeing компанияси Қатарга 200 млрд долларлик 160 дан ортиқ самолёт етказиб бериши тўғрисидаги келишувни ҳам ўз ичига олади.  

Бундан ташқари, Саудия Арабистонида бўлиб турган пайтда Трамп Сурияга қарши барча АҚШ санкцияларини бекор қилишини эълон қилди. Бу қарор ижтимоий ва дипломатик доираларда катта резонансга сабаб бўлди. Трамп, шунингдек, Сурия муваққат президенти Аҳмад аш-Шара билан учрашди ва уни Исроилни тан олиш ва Иброҳим келишувларига қўшилишга даъват этди.