Арманистоннинг собиқ президентига айблов қўйилди

Арманистоннинг собиқ президенти Серж Саргсян порахўрлик ва тадбиркорлик фаолиятида ноқонуний иштирок этганликда айбланмоқда. Бу ҳақда “Armenpress” ахборот агентлиги хабар берди.

Агентликка кўра, Саргсян иши Коррупцияга қарши кураш қўмитаси томонидан текширилмоқда.

Тергов маълумотларига кўра, Саргсян 2000-2018 йилларда Арманистон мудофаа вазири, бош вазир ва президент лавозимларини эгаллаб, қонун билан тақиқланганига қарамай, тадбиркорлик фаолияти билан шуғулланган. Шу билан бирга, у ўз мансаб мавқейидан фойдаланиб, ишончли шахслар орқали тижорат компаниялари ташкил этиш ва уларни бошқаришда иштирок этишда гумон қилинмоқда.

Хусусан, тергов маълумотларига қараганда, Серж Саргсян чет эл сармоясини жалб қилиш баҳонасида ўзининг яқин дўсти M.Б. ва унга тегишли тузилмаларни Арарат вилоятидаги Суренаван қишлоғида битум заводи яратишга жалб қилган. Шу мақсадда 2006 йилда компания ташкил этилган бўлиб, унинг акцияларининг 50 фоизини M.Б. компаниялари, яна 50 фоизини эса Кипрда рўйхатдан ўтган икки рус компанияси олган.

Кейинроқ Саргсян M.Б.дан сиёсатчининг жияни ва Арманистон иккинчи президенти Левон Кочаряннинг ўғли асос солган бошқа компаниядаги 22,5 фоиз акцияларини пора тариқасида беришни талаб қилган. 2008 йилда бу улуш расман ушбу компанияга сотилган. Кейинроқ Саргсян иккинчи президентнинг ўғлига 6 миллион доллар беришни талаб қилган.

“Newsarmenia.am”  хабарига кўра, дастлабки тергов ниҳоясига етган ва Саргсяннинг иши айблов хулосаси билан Арманистон Коррупцияга қарши курашиш судига юборилган.

Эслатиб ўтамиз, аввалроқ Тунис суди собиқ президент Монсеф Марзукини сиртдан 22 йилга озодликдан маҳрум қилганди.