Америка аскарларини Украинага юбормайди – Трамп

АҚШ Президенти Дональд Трамп америкалик ҳарбийлар Украинага юборилмаслигини айтди. Бу ҳақда у кеча, 15 июль куни Вашингтондан Пенсильванияга учиш олдидан Эндрюс ҳарбий авиабазасида журналистлар билан бўлиб ўтган суҳбатда сўз очди.

“Бизнинг аскарларимиз Украина ҳудудидаги жанговар ҳаракатларда қатнашмайди”, деган Оқ уй раҳбари. 

Трамп, шунингдек, Украинага қурол-яроғ етказиб бериш давом этишини, аммо бу харажатлар Европа мамлакатлари томонидан қопланишини билдирган. Аввалроқ НАТО Бош котиби Марк Рютте бу борада изоҳ берар экан, Америка қуроллари аввало Европага етказилишини, ундан кейин эса Украинага ўтишини маълум қилганди – айнан европаликлар бу қуроллар учун тўлов қилгани боис бундай тартиб жорий этилган.

Шу билан бирга, Трамп 14 июль куни НАТО Бош котиби Рютте билан учрашувда Россиядан жуда норозилигини билдирган ва агар 50 кун ичида ўт очишни тўхтатиш бўйича битимга эришилмаса, Россия ва унинг савдо ҳамкорларига нисбатан 100 фоиз миқдорида бож тўловлари жорий этилишини айтган.

Кремль эса бу баёнотга эҳтиёткорлик билан муносабат билдирган. Москва Трампнинг сўзларини “жиддий” деб баҳолаган. 

“Киев Вашингтонда қабул қилинаётган қарорларни тинчликка даъват эмас, балки урушни давом эттириш учун ишора сифатида қабул қилмоқда”, деган Кремль воизи Дмитрий Песков.

Трамп бир томондан АҚШ ҳарбийларини урушга аралаштирмасликка ваъда бермоқда, иккинчи томондан эса босим сиёсатини давом эттириб, Россияга иқтисодий чоралар билан таҳдид қилмоқда. Бу эса унинг позицияси асосан ҳарбий аралашув эмас, балки сиёсий ва иқтисодий босим воситалари орқали низони тўхтатишга қаратилганини кўрсатади.

Эслатиб ўтамиз, АҚШ Президенти Дональд Трамп Украина етакчиси Владимир Зеленский Россия пойтахтига зарба беришга буйруқ бермаслиги кераклигини айтганди. Баъзи америкалик манбаалар эса Трамп ва Зеленский Москвага зарба беришга келишгани ҳамда бу учун керакли кучни АҚШ етказиб беришга ваъда бергани ҳақида ёзганди.