Трамп Путинга 50 кун муҳлат берди

Агар яқин 50 кун ичида Украинада тинчлик ўрнатиш бўйича келишувга эришилмаса, АҚШ расмийлари Россиянинг савдо ҳамкорларига 100 фоизлик иккиламчи божлар жорий қилади. Бу ҳақда Президент Дональд Трамп кеча, 14 июль куни Оқ уйда НАТО Бош котиби Марк Рютте билан учрашувда маълум қилди.

“Агар биз 50 кун ичида келишувга эришмасак, иккиламчи тарифларни жорий қиламиз. Ва улар 100% бўлади. Мен савдодан кўп мақсадларда фойдаланаман. Урушларни тугатиш учун бу жуда яхши”, деди Трамп.

Республикачига кўра, Украинадаги тинчлик музокараларида, жумладан, у билан Владимир Путин ўртасидаги тўғридан тўғри музокараларда ҳамон “доимий суҳбат” ҳукм сурмоқда.

“Кейин эса ракеталар Киевга учиб, одамларни ўлдиради. Буни тўхтатиш керак”, деб давом этди Трамп.

Унинг қўшимча қилишича, унинг “Путиндан ҳафсаласи пир бўлган” ва у билан бир неча ой олдин келишувга эришишга умид қилган.

Журналистларнинг АҚШ ва унинг иттифоқчилари Украинага Patriot ҳаво мудофаа тизимларини етказиб беришни режалаштиряптими, деган саволига Трамп бу “бир неча кун ичида” амалга ошишини айтди.

“Бизда 17 та Patriot тизими мавжуд бўлган битта мамлакат бор, улар жўнатишга тайёрланмоқда. Уларга керак бўлмайди. Шундай қилиб, биз ўша 17 та қаерга бориши ҳақида музокаралар олиб борамиз – уларнинг аксарияти. Улар уруш тарафига кетмоқчи”, деди Трамп.

Унинг сўзларига кўра, Patriot битимида ушбу тизимларга эга бўлган бир қанча давлатлар иштирок этади. Улар тизимларни алмаштиради. Президентнинг қайд этишича, бу иш АҚШнинг НАТОдаги доимий вакили Мэтью Уитакер томонидан мувофиқлаштирилади.

Аввалроқ Трамп Вашингтон Patriot тизимларини кейинчалик Киевга етказиб бериш учун европаликларга сотмоқчи эканини айтганди.

“Украина ҳақиқатан ҳам катта миқдорда ҳарбий техника олади: ҳаво мудофааси, ракеталар ва ўқ-дорилар”, деди Рютте 14 июль куни Оқ уйда.