“Ал-Наср”га қўйилган трансфер тақиғи бекор қилинди

FIFA Саудия Арабистонининг “Ал-Наср” клубига янги ўйинчилар билан шартнома имзолаш ва рўйхатдан ўтказишга қўйилган тақиғини бекор қилди.  Бу ҳақда инсайдер Фабрицио Романо хабар берди.

Манбага кўра, FIFA “Ал-Наср” ўз мажбуриятларини бажарганини тасдиқлади ва клубга қарши иш ёпилди.

Маълумотларга кўра, “Ал-Наср”га қўйилган трансфер тақиғи клубнинг 2023 йилда марказий ҳимоячи Аймерик Лапорте трансфери учун “Манчестер Сити”га тўланмаган пуллар билан боғлиқ. Саудия Арабистони клуби “шаҳарликларга” тахминан 9 миллион евро тўламагани таъкидланган. 

Бу тақиқ “Ал-Наср” учун FIFA томонидан қўлланган биринчи санкция эмас. Хусусан, 2023 йилда клуб трансфер қоидаларини бузгани сабабли учта трансфер ойнаси давомида футболчиларни рўйхатдан ўтказиш ҳуқуқидан маҳрум этилган эди. Кейинчалик масала 2 миллион евро миқдоридаги жарима тўланганидан сўнг ҳал қилинган.

Маълумот учун, жорий йилнинг ёзида “Ал-Наср” трансфер бозорида 100 миллион евродан ортиқ маблағ сарфлаб, Жоау Феликс, Иньиго Мартинес, Кингсли Коман ва Моҳамед Симакан каби таниқли футболчиларни ўз сафига қўшиб олган эди.

Эслатиб ўтамиз, аввалроқ Криштиану Роналду тўп сурадиган “Ал-Наср” клубига FIFA янги футболчиларни рўйхатдан ўтказишни тақиқлагани ҳақида хабар берилган эди.