АҚШда сўнгги 15 йил ичида илк бор маҳбус отиб ўлдирилди

Америка Қўшма Штатларида 15 йил ичида биринчи марта ўлим жазоси отиш усули билан ижро этилди. Бу ҳақда “Associated Press” хабар берди.

Қайд этилишича, жазога тортилган 67 ёшли Брэд Сигмон Жанубий Каролина штатидан бўлган. У собиқ қиз дўстининг ота-онасини бейсбол таёқчаси билан ўлдирган. Уни қатл қилиш жазоси кеча, 7 март куни амалга оширилган.

Сигмон 2001 йилда Гринвилл туманидаги уйда Дэвид ва Гладис Ларкни ўлдирган. Тергов маълумотларига кўра, қотилликдан сўнг у собиқ севгилисини қурол билан қўрқитиб, ўғирлаб кетган, бироқ қиз қочиб қутулган. Прокурорларнинг фикрича, Сигмон қочаётган қизга ўқ узган, аммо нишонга тегмаган.

Қатл маросими уч нафар турмадаги ходимлар томонидан отиш усули билан амалга оширилган.

Сигмоннинг адвокатларига кўра, у ўзига ўлим жазоси усулини танлашни сўраган, чунки электр стули уни “тириклайин қовуришидан” қўрққан.

Шундай қилиб, Сигмон АҚШда 1976 йилдан буён Жанубий Каролинада қатл этилган 46 маҳбус ичида энг ёши улуғи бўлган.

Эслатиб ўтамиз, аввалроқ ўлим жазосига ҳукм қилинган Брэд Сигмон ўз қатлини отиб ўлдириш усули билан амалга оширишни сўрагани ҳақида хабар берилганди.