АҚШ келаси ҳафтада Украинага оид тинчлик режасини эълон қилади

АҚШ Президенти Дональд Трамп маъмурияти Россия-Украина урушини тўхтатиш бўйича узоқ кутилган режани тақдим этади. Бу ҳақда ўз манбаларига таяниб, “Bloomberg” хабар берди.

Нашрнинг ёзишича, режани Трампнинг Украина ва Россия бўйича махсус вакили Кит Келлогг Германияда 14-16 февраль кунлари бўлиб ўтадиган Мюнхен хавфсизлик конференциясида иттифоқчиларга тақдим этади. Бироқ муҳокамалар қанчалик батафсил бўлиши ва қандай форматда ўтиши ҳозирча номаълум.

“Келлогг ва бошқалар сўнгги ҳафталарда Трамп тарафдорларининг “куч орқали тинчлик” деб атаётган тамойилига шама қилишди. Эҳтимолий нуқталар – можаронинг музлатилиши ва Россия қўшинлари босиб олган ҳудудни ноаниқ ҳолатда қолдириш, шунингдек, Украинага Москва яна ҳужум уюштира олмаслиги бўйича хавфсизлик кафолатларини тақдим этиш”, дейилади хабарда.

Бундан ташқари, Трампнинг махсус вакили шу ой Киевга ташриф буюриб, Зеленский билан учрашиши кутилмоқда.

Аввалроқ Келлогг Трамп Кремлга ён бериш ниятида эмаслигини, аксинча, Украинани ҳимоя қилишга интилаётганини маълум қилганди.

“У ҳақиқатан ҳам Украина ва унинг суверенитетини сақлаб қолишни хоҳлайди ва у... буни қайта-қайта айтди”, деганди Келлогг “Fox News” телеканалига берган интервьюсида Трампнинг 7 январдаги матбуот анжуманидаги нутқини шарҳлар экан.

Келлоггнинг айтишича, Трамп яқин келажакда урушни тугатиш учун мақбул ечим таклиф қилиши мумкин. Келлогг Қўшма Штатлар ўт очишни тўхтатишдан кейин Украинада сайловлар ўтказилишини исташини таъкидлади ва Трамп АҚШнинг ёрдами эвазига муҳим минералларга кириш келишувнинг бир қисми бўлиши мумкинлигини кўрсатди. Президент, шунингдек, агар музокаралар олиб бормаса, Москвани кенг кўламли санкциялар билан таҳдид қилган.

Эслатиб ўтамиз, илгари Дональд Трамп бир неча бор 24 соат ичида Украинадаги урушни тўхтатишини таъкидлаган. Кейинчалик, АҚШнинг қайта сайланган президенти Украинадаги можарони тартибга солиш ишларини 2025 йил январидан бошлаши маълум қилганди. Жорий йил январь ойида эса Трамп Россия Президенти Владимир Путин билан учрашувга тайёргарлик кетаётганини билдирди. Кейинчалик, АҚШ раҳбари Украинадаги урушни 100 кун ичида тугатишни буюргани маълум бўлди.