19 ёшли велоспортчи пойгадаги ҳалокатдан сўнг вафот этди

Британиялик велоспортчи Финлей Тарлинг Португалиядаги “Вуэлта” пойгасининг саккизинчи босқичида олган оғир жароҳатлари оқибатида вафот этди. Бу ҳақда “The Guardian” хабар берди.

19 ёшли уэльслик спортчи пойга вақтида қарама-қарши йўналишда келаётган автомобиль билан тўқнашиб кетган.

“Фин жамоамизнинг жуда севимли аъзоси эди. Аммо энг муҳими, у кўпчилик учун ўғил, ака ва дўст эди. Биз уни жуда соғинамиз”, дея маълум қилган унинг жамоаси – NSN Development Team.

Португалия Президенти Антониу Жозе Сегуру ҳам спортчининг оиласи ва яқинларига таъзия билдирган. У Тарлингнинг вафоти пойга ва мезбон мамлакатни қайғуга солганини таъкидлаган.

“Вуэлта а Португал” пойгасининг саккизинчи босқичи фожиали воқеадан сўнг “ҳурмат ва қайғу белгиси сифатида” тўхтатилган.

Маълумот учун, Финлей Тарлинг жорий йилнинг июнь ойида ўтказилган Британия чемпионатида 23 ёшгача бўлганлар ўртасидаги индивидуал спринт баҳсларида учинчи ўринни эгаллаган эди.