Ҳусанов “Ман Сити”да қачон дебют қилади?

“Манчестер Сити” футболчисига айланган Абдуқодир Ҳусановнинг клуб таркибидаги илк ўйини қачон ўтказилиши мумкинлиги маълум қилинди. Бу ҳақда клубга доир манба хабар берди.

Манбага кўра, UEFA қоидалари асосида Абдуқодир Ҳусанов “Манчестер Сити”нинг жорий мавсум Чемпионлар лигаси гуруҳ босқичи рўйхатига қўшила олмайди. Шу сабабли, у  22 январга ўтар кечаси бўлиб ўтадиган ПСЖга қарши ўйинда майдонга тушмайди. Бироқ ундан кейинги муҳим учрашувда иштирок этиш имконияти пайдо бўлади. 26 январь куни АПЛ доирасида Лондоннинг “Челси” клуби “Этиҳад”да меҳмон бўлади. Ушбу баҳс Премьер лигадаги юқори ўринлар учун курашда ҳал қилувчи ўйин бўлиши мумкинлигини ҳисобга олиб, Ҳусанов шу учрашувда асосий таркибда майдонга тушиши мумкин.

Таъкидланишича, клуб таркибидаги ҳимоячилар Аке ва Стоунс жароҳат олган, бу эса ўзбекистонлик футболчининг яқин кунларда майдонга тушиш эҳтимолини оширади.

Эслатиб ўтамиз, кеча, 20 январь куни Тошкент вақти билан 23:00 да “Манчестер Сити” Абдуқодир Ҳусановни ўз футболчиси сифатида таништирганди.