Husanov “Man Siti”da qachon debyut qiladi?

“Manchester Siti” futbolchisiga aylangan Abduqodir Husanovning klub tarkibidagi ilk o‘yini qachon o‘tkazilishi mumkinligi ma’lum qilindi. Bu haqda klubga doir manba xabar berdi.

Manbaga ko‘ra, UEFA qoidalari asosida Abduqodir Husanov “Manchester Siti”ning joriy mavsum Chempionlar ligasi guruh bosqichi ro‘yxatiga qo‘shila olmaydi. Shu sababli, u  22 yanvarga o‘tar kechasi bo‘lib o‘tadigan PSJga qarshi o‘yinda maydonga tushmaydi. Biroq undan keyingi muhim uchrashuvda ishtirok etish imkoniyati paydo bo‘ladi. 26 yanvar kuni APL doirasida Londonning “Chelsi” klubi “Etihad”da mehmon bo‘ladi. Ushbu bahs Premer ligadagi yuqori o‘rinlar uchun kurashda hal qiluvchi o‘yin bo‘lishi mumkinligini hisobga olib, Husanov shu uchrashuvda asosiy tarkibda maydonga tushishi mumkin.

Ta’kidlanishicha, klub tarkibidagi himoyachilar Ake va Stouns jarohat olgan, bu esa o‘zbekistonlik futbolchining yaqin kunlarda maydonga tushish ehtimolini oshiradi.

Eslatib o‘tamiz, kecha, 20 yanvar kuni Toshkent vaqti bilan 23:00 da “Manchester Siti” Abduqodir Husanovni o‘z futbolchisi sifatida tanishtirgandi.