Ҳиндистон Россия билан савдони узмоқда – ОАВ

Ҳиндистоннинг давлатга қарашли нефтни қайта ишлаш заводлари ўтган ҳафтадан бошлаб Россиядан нефть харид қилишни тўхтатди. Бу ҳақда саноатдаги манбаларига таяниб, “Reuters” хабар берди.

Ушбу қарор АҚШ Президенти Дональд Трампнинг Россиядан нефть харид қилаётган давлатларга қарши жазо чоралари ҳақида берган огоҳлантиришлари фонида қабул қилинган.

Камида тўртта йирик давлат компанияси – Indian Oil Corp, Hindustan Petroleum Corp, Bharat Petroleum Corp ва Mangalore Refinery Petrochemical Ltd Россиядан янги партиялар харидини амалга оширмаган. Улар ўрнига нефтни спот бозорлар орқали, асосан Абу-Дабидан Мурбан маркали ва Ғарбий Африкадан келаётган навлар билан алмаштиришга ўтган.

Маълумот учун, Ҳиндистон дунёдаги учинчи йирик нефть харидори ҳисобланади ва Россиядан денгиз орқали энг кўп нефть импорт қилувчи мамлакат саналади.

Эслатиб ўтамиз, Дональд Трамп 14 июль куни Россия Киев билан тинчлик келишувига эришмаса, ушбу мамлакатдан нефть харид қилаётган давлатларга 100 фоизли бож жорий этишини айтганди. 29 июль куни эса у Россияга босим ўтказиш мақсадида 10 кун ичида натижа бўлмаса, божлар кучга киришини маълум қилди. Қолаверса, Ҳиндистонга 1 август кунидан бошлаб 25 фоизлик божлар кучга кирадиган бўлди.